Kumba long ka Congress ha u snem 2014, ka NPP ruh ka lapmiet tang ban buh mawnongrim : BJP

Shillong, Nohprah, 06: “Kumba long ka seng Congress ha u snem 2014, ka NPP kaba la sdang ngam ka la lapmiet ha ka khyllipmat ba khatduh ban plie bad ban buh mawnongrim,” ong ka Bharatiya Janata Party (BJP).
U State President jong ka BJP, u Bah Ernest Mawrie ha ka sngi Baar u la siat shi maw ïa ka NPP kaba leh smat kynsan kynsan ban trei na ka bynta u paidbah.
Haba pynïasyriem bad ka Sorkar Congress ha u snem 2014, u Bah Mawrie u la ong, “ka NPP ka sngewthuh bha ïa ka jinghiar jong ka bad ka jingkhih bitar jong ki paidbah pyrshah ïa ki. Ka NPP ka sngewthuh bha ba kam shym la leh eiei ha ki saw snem shiteng na ka bynta ki paidbah. Ki tip ba ki paidbah ki la rai ban jynrat na ka bor synshar.”
“Kumba long ka Congress ha u snem 2014 (shwa ka elekshon jong ka Lok Sabha), ka NPP ruh mynta ka la pynlap miet tang ban plie bad buh mawnongrim,” u la ong.
U Bah Mawrie u la ong, bun na ki projek ki kiba la plie ki dei ki bym pat dep pura satia bad ki mawnongrim ki dei kiba la shu buh khlem da pyrkhat sani bad khlem kano kano ka jingmang pisa.
U la ong, “kine ki dei tang kiba rit. Kine baroh la shu leh tang ban pynbiej ïa ki paidbah nongthep vote khnang ba kin ai ka jingshahniah ïa ka NPP sa shisien pat.”.
Shuh shuh u Bah Mawrie u la ong ba bun na ki kam pynroi ki dei kiba ladep leh ha kine ki saw snem shiteng ki dei ki skhim jong ka Sorkar Pdeng ba la ïalam da ka BJP.
Halor ka skhim FOCUS ruh, u Bah Mawrie u la pynpaw ka jingsngew lyngngoh naei ka pisa ka wan.
U Bah Mawrie u la ong, ka jingpynkylla kyrteng ïa ki skhim jong ka Sorkar Pdeng bad ka jingpynkylla ïa ki song jingïarap ka Sorkar Pdeng ka long tang ban shu pynbiej ïa u paidbah.
“Ki paidbah ka jylla Meghalaya ki tip bha ba u Myntri Rangbahhduh ka ri u Narendra Modi u la wanrah ïa ki song pynroi, bad ki paidbah ki la rai ruh ban wanrah ïa ka Sorkar ar ejin jong ka BJP ha ka jylla Meghalaya,” u la bynrap.