Haduh 658 ngut ki nongbylla sngi bad nongtrei iing briew pynkup burom u Bah Sanbor Shullai

By Mawphor Editor On Dec 7, 2022

Shillong, Nohprah 06 : Ka BJP Shillong South ryngkat ka jingïatreilang bad ka MCIC ka la sam haduh 658 tylli ki khusnam sha baroh ki nongtrei bylla sngi, nongtrei Ïing briew, nongbylla Saitjaiñ, ASHA, Anganwadi bad bun kiwei kiwei ha ka jingïalang pynkup burom kaba long ha State Central Library Shillong.
Ïa kitei ki khusnam la sam da u MLA ka thaiñ Bah Sanbor Shullai ba dei ruh u Myntri ka sorkar jylla ha kaba baroh ki ïoh da ki jingai sngewbha bad ka song pisa.
Ha kane ka prokram kitei ki 658 ngut ki nongtrei kiba u MLA u la pynkup burom ki kynthup naduh ki nongñiah taksi, nongsar surok, nongsait jaiñ nong, ki nongtrei Anganwadi, ki ASHA, ki nongsam shana bad kiwei kiwei.
U Bah Sanbor haba kren ha kane ka jingïalang u la ong ba kine ki nongtrei ki dei kiba la noh synniang shibun sha ka imlang ka sahlang bad khlem ma ki, ka lah ban pynkhih win ïa ka jylla khamtam ïa ka jinglong ki shnong ki thaw.
“Lada maphi baroh phi ïa sangeh trei katno kan kulmar baroh kawei ka jylla,” ong u Bah Sanbor haba kren ha katei ka sngi.
U la pyntip ruh ba ka jingsam ïa ka song pisa ka dei kaba u la lah ban pynlang na ka tulop MLA ka jong u, kaba la kot sha ka 14 lak tyngka tam bad ong ruh ba ha u snem ban wan un sa leh kham bha shuh shuh.
U la kyntu ruh ïa kiwei pat ki MLA ba kin bud ïa kane ka nuksa naba kane kadei kaba nyngkong eh ba ka constituency ka la pynlong ïa kane ka jingithuh ïa ka jingtreikam jong ki.
“Lada na ka T. 2 lak 3 hajar ka tulop ki MLA ha ka shibnai ki pynlang ban ïarap ïa kiba kum kine ki briew kan long ka jingmyntoi ïa kum kine ki longïing,” u la ong da kaba bynrap ba ïa kane u la pynlang manla u snem bad un ïai sam ruh ïa kine ki khusnam manla u snem.
U la ba kan long ka bym dei ban ithuh ne ai khusnam tang ïa kiba paw ha kiwei ki kam hynrei la klet pat ïa kum kine ki longïing.
U la ïathuh ba ïa kane pisa u la thep hapoh ka MLA Charitable fund kaba long kum ka jingïarap ïa kiba rit ba ria bad kiba rit ka jingsiew da kaba ïathuh ruh ba hadien ka jingïakren kaba jur hapoh kynhun myntri mynta ka Sorkar ka la mynjur ban kyntiew ïa ka Honorarium kiba trei Anganwadi.