Dawa ka shnong ban buh beit ïa Border OutPost ha Zero Point

Jowai, Nohprah 06: U Chief Executive Member (CEM) ka Jaiñtia Hills Autonomous District Council (JHADC) u ma Thombor Shiwat mynta ka sngi ha ka ryngkat ka Executive Committee jong u kila leit hiar sha ka shnong Mukroh hadien ka jingshah siat ïap jong ki san ngut ki nongshong shnong ha ki pulit Assam kaba la jia ha ka 22 tarik u Naiweing.
Kane ka kynhun EC ha ka jingsynran lang jong ki nongïalam shnong kila leit jngoh ïa kane ka jaka haduh Zero Point kaba dang hap hapoh u pud u sam jong ka shnong Mukroh kaba ki khot ka Moothasiangkwai bad la pyni syndon ïa ka map jong ka shnong ban pynshisha ba katei ka jaka ka dang hap shapoh ka Meghalaya.
Na ka liang kitei ki nongïalam shnong ki la dawa ba dei ban buh beit ïa ka BOP ha katei ka jaka Moothasiangkwai khnang ban lait na kino kino ki jingïa khajia pud hadien habud bad kan long ruh kaba shngaiñ ïa ka paidbah nongshong shnong ba im ha kitei ki jaka.
Ha kane ka jingleit jurip ki nongïalam ka EC kila pynpaw ka jingsngewphylla kumno ba ka sorkar Assam kala wan buh ïa ka Forest Beat House shapoh u pud u ang jong ka jylla Meghalaya khlem da kynjoh ktien na ka District Council.
Na ka liang u ma Thommbor haba kren sha ki lad pathai khubor ula pynpaw ba kane ka jingleit jngoh ïa ka shnong Mukroh ka long halor ka nongrim ba ka Council ka dei ka nongpeit ïa ka khyndew ka shyiap bad ka kwah ruh ban pynshisha ba kane ka jaka ka dang hap hapoh ka Meghalaya lyngba ka jingdon ki kot ki sla ba biang.
Katkum ka jinglap jong kane ka kynhun EC mynta ka sngi kila sakhi ba ka don shisha ka jingwan kyntur pud jong ka Assam shaduh ka shnong Mukroh kaba la wan rah ruh ïa ka jingjia ba sngewsih. Ula pynrem ruh halor ka jingshna ia ka Forest Beat House khlem da don ka jingpanbor na ka District Council, U la ong ba ka shnong Mukroh kam dei ka jaka kaba hap ha ki jaka ïakhajia pud hynrei ka dei kaba dang hap hapoh ka jingpeit jingkhmih jong ka JHADC.
Ha kaba ïadei bad ka jingsyniang sha kito ki longïing bala duh ïa kiba ieit ba thoiñ na ka liang u ma Thombor Shiwat ula pyntip ba ka Council kan sa ai ïa ka lad jingïarap kaba kot la ka bor sha kitei ki longïing kaba long ruh kum ka dak jong ka jingsngewlem.
Shuh shuh ula pynthikna ba kum ka Council kan ïeng shynrang ban ïada ïa u pud u sam kane ka shnong wat hapdeng ka jingpyrshang jong ka Assam ban kam jubor ïa kane ka shnong.
Halor ka jingkren laplah jong u CEM ka KAAC u ma Thombor Shiwat u pynpaw ka jingpynrem jur ïa kane ka jingkhot ïa ka shnong Mukroh kum ka shnong poiwir ne kiba shong wan shong beaiñ, u kyrmen skhem ba kane ka jingpynbeit pud hapdeng kine ki ar jylla kan long kaba jop khlem da shah ktah ïa ki nongshong shnong ha khappud.
Ula kren shai kum ka Council kan ïeng skhem ha ka nongrim katkum ka Notification ba la ïoh copy hapoh ka Dictrict Council khnang ban pynshisha ïa katei ka jaka kaba dang hap hapoh ka District Council.
Ha kane ka sngi kitei ki dkhot ka EC kila pynlong ïa ka jingsngap jar kaba shipor ha katei ka jaka ba shah siat ïap ki nongshong shnong ka Mukroh.