Bym pat lah ban pyntikna ïa u pud u sam, pynsangeh ka KSU ïa ka jingker sainar siah ha khappud

Jowai, Nohprah 06: Ka Khasi Students’ Union (KSU) War Jaiñtia Circle bad ka Khasi Students’ Union West Jaiñtia Hills District ha ryngkat ka H.N.Y.F Southern Riwar Circle ha kane ka 3 tarik mynta u bnai ka la hiar sha ka Shnong Rongkum Amlympiang ban pynsangeh mardor ïa ka jingpyntrei ïa ka jingker sainar siah (Border Fencing) ha kitei ki jaka.
Kine ki ar seng marsien ïoh jingtip ba ka Sorkar ka la sdang ban ïaid shakhmat ïa ka Border Fencing ka la leit ban pynsangeh shisyndon bad ban beh ïa kine ki nongtrei jong ka Company na ka daw ba ka seng ka dawa ba kat bym pat lah ban pynthikna ïa u Pud u Sam uba thikna bad ban ker na Zero Point.
Kine ki ar Seng kin ym pdiang ïa kane ka jingleh jong ka Sorkar ha shilynter u Pud u Sam jong ka India bad Bangladesh hapoh War Jaiñtia.
La ïathuh lada kin ker ïa kata ka 150 yard kat ktah lut ïa ki jaka ki puta jong ki paradoh parasnam kiba im sha katei ka thaiñ, khamtam kiba im ha ka rep ka riang bad ki shnong ha khappud kin duh ïa u pud shnong pud thaw.
Shuh shuh ki ar Seng ki pynrem jur ïa ka Sorkar khamtam ïa u Local M.L.A kane ka thaiñ kiba nud ban ïaid shakhmat ban lilam ïa ki jaka ki puta jong ki paradoh parasnam sha ka Ri Bangladesh, kum u Nongmihkhmat ha ka jingshisha u dei ban long u nongïada ïa ka hok longbriew manbriew jong ki paradoh parasnam bad ban ïeng Rangbah na ka bynta ka jingmyntoi jong ka thaiñ War Jaiñtia kumba u la kular ha u snem 2018 ba shi inch ka jaka ruh kan ym leit sha ka Ri Bangladesh.
Hynrei mynta pat da khongpong ki kular bad ula pynshong syier ïa ki paidbah jong ka thaiñ kiba don sha khappud lyngba ka jingthmu bad ki jingailad jong u ïa ka Sorkar ban ïaid shakhmat ha ka ban ker Sainar shiah. Te na ka liang ki ar Seng ki dawa na ka Sorkar bad u Local M.L.A ba ki dei ban pyndam shwa shisyndon ïa kane ka order bad ban shim ïa ki lad ki lynti kumno ban ïada ïa ki paradoh parasnam kiba don jaka sha ki thaiñ khappud, pynkut ka seng ha ka kyrwoh ba la phah.