Nongstoiñ, Nohprah 5: “Ka jingshim rai jong ki Myntri Rangbah jong ka sorkar Meghalaya bad Assam, ban pynbeit ïa u pud u sam hapoh ka 15 tarik u bnai Kyllalyngkot ban wan ha ki lai tylli ki jaka jong ka West Khasi Hills ka Tarabari, Gizang reserve forest bad Hahim sector ka long kaba dei eh ban pdiang. Hynrei kaba pynsahnud ïa ngi ka dei namar ba kitei ki Myntri Rangbah, kim shym la pynbna pat lano kin sdang ban leit jurip ïa ki jaka kiba hap ha ka Langpih sector ong ki riew rangbah na ki shnong khappud kiba hap ha ka Langpih sector”, ong u bah L.J.Nongteiñ uwei na ki riew rangbah na ka shnong Nongmawleiñ.
Katto katne ngut ki rangbah Garo na ka shnong Nawapara, ki la ong ba kitei ki lai tylli ki jaka kiba ki ar sorkar kin sa ïa pynbeit noh hadien ba ki Chairman jong ki Regional Committee on Border Dispute ki la dep aiti ïa ki kaiphod, kim da dei eh ki jaka kiba eh ban ïapynbeit hynrei ka sector kaba eh tam ka dei ka Langpih, namar baroh ki Nepali kiba wan buhai shnong ha katei ka thaiñ ki la dei lut ki jong ka Assam bad ba ka sorkar Assam ka shaniah bad theh ïa ki jingïarap katba ki donkam.
Ki la ong ruh ba ka sorkar Assam ka la pynbiang ïa ka surok, ka bording, ka Sub health centre ka la don ruh ki skul bad kiwei kiwei kumta kan shem jingeh bha ban ïakren. Ki la ong ba ka sorkar Asasam ka la theh ruh ki jingïarap na ka bynta ka rep ka riang lyngba ka Agriculture Department, hynrei na ka liang ka sorkar Meghalaya pat imat ba kam sngew myntoi ban theh ki kam pynroi namar ki pulit jong ka Assam ki ju pyndik man ka por.
Wat la katta ruh, kitei ki rangbah ki la kyntu ïa ki ar ngut ki Myntri Rangbah ba kin bthah ïa ki Chairman jong ki Regional Committee, ba kin nang pynbeit noh ïa ka por ban leit jurip ïa ki jaka kiba hap ha ka Langpih sector, khnang ba ki paidbah nongshong shnong kin nang pynsngewthuh ïa ki paidbah kaei kaba ki dei ban leh.
