Jowai, Naiwieng 30 : Ka Chi-Jingmut Society Mynso-B ha ryngkat ka jingïa snohkti lang ka ophis Nehru Yuva Kendra Sangathan (NYKs) Jowai ka la rakhe ïa ka Constitution Day ha ka 26 tarik jong une u bnai ha Community Hall Mynso-B hakane ka sngi ki nongshong Shnong jong ka Mynso-B ki la ïamih shit rhem ban ïashim bynta lang ha kane ka prokram.
Ha kane ka sngi la pynlong ka jingïalang ba lyngkot la pynïaid da u samla Shembha Lamare uba dei u Secretary jong ka Society, ha ka jingdonlang u ma R.M. Khlem Rangbah Shnong Mynso-B, u President VDP ma R. Lamin, u ma Dawan Lyngdoh MDC Mynsngat Khanduli Constituency kum u kongsan, ka Kong Alma Myrchiang CBRW Com munity Base Reha bilitation Wordless na ka tnad Social Welfare, la don ruh ka jingpule ïa ka pledge ba la lam khmat da u Rangbah Shnong Mynso-B.
Na ka liang u kongsan MDC ma Dawan Lyngdoh haba ai jingkren ula kyntu ïa ka Society ba kan nangïai bteng ïa kane ka kam ba bha khamtam sha ki thaiñ nongkyndong, ula ong ruh kum ki nongshong shnong jong ka Ri India ki dei ban don ka jingkit khlieh halade hi ban kyntiew ia ka Ri bad ka jaitbynriew.
Kiwei de kiba ai jingkren ki kynthup ïa ka Alma Myrchiang CBRW Social Welfare kaba la batia shaphang kito jingduna ha ki dkhot met da kaba kyntu ba kin pyntip sha ka tnad Social Welfare khnang ba kin ïoh jingïarap na ka Sorkar, ïa ki kyntien ai khublei la ïoh na ka kong Wilis Syntem.
