Kwah ka AITC da ka President Rule ba la pheil ka sorkar MDA ïa ka shongsuk ha ka jylla

Shillong, Naiwieng 28: Ka seng ba don ha ka Liang Pyrshah jong Ïing Dorbar Thaw Aiñ ka jylla ka All India Trinamool Congress (AITC) ha ka sngi nyngkong ka la pynpaw ïa ka jingkwah ban wan noh da ka President Rule ha ka jylla namar ka jingpheil ka sorkar ha baroh ki liang kiba ka dei ban ai jingshakari sha u paidbah ka jylla la ha kaba ïadei bad ka shongsuk shong saiñ, ka jingsngew shngaiñ ki paidbah ba shong ka ki thaiñ khappud wat hadien ba 57 sien ba ka sorkar Assam lyngba ka tnat pulit jong ka ka la pynthud ïa ki nongshong shnong ka jylla ha ki khappud ha kine ki saw snem tam ba la leit.
Haba kren bad ki lad pathai khubor hadien ba la mih na ka jingïalang ba la khot da u Myntri Rangbha ka jylla ha Secretariat ïa baroh ki seng saiñ pyrthei ban ïakren halor ka jingjia ha Mukroh bad ban pan jingmut na ki, u Opposition Chief Whip uba dei ruh u Vice President ka AITC, Meghalaya u Bah George B Lyngdoh u la ong ba ka jingbym lah satia ka sorkar ban ai jingshngaiñ ha ka jylla khmatam eh ha ki thaiñ khappud ka dei hok ba kan shim jingkit khlieh ban hiar shuki lut da baroh ki myntri ym tang u myntri kam poh ïing khnang namar ban ïa kane ka rukom synshar ka sorkar MDA ka dang kham lah ka President Rule ne ban pynlong noh da ka General Election sha ka Ïing Dorbar Thaw Aiñ u la ong.
“Kaba donkam ïa kane ka sorkar mynta ka long ba kan sngewthuh shai ba kam long kaba bit dor ban bat ïa u lakam synshar namar kam lah ban pyndep la ka kamram kaba ka dei ban leh na bynta u paidbah ka jylla, phin peit kaei kaba la jia ha Mukroh bad ha sor Shillong ha kaba ki pulit ki bthah hi ïa ki ba buh dukan ba kin khang dukan namar kim lah ban ai jingpahara wat ha sor bad kane ka pyni shai ba ka sorkar MDA ka la pheil, namarkata ka kynhun myntri ka dei ban hiar shuki noh ban wan da ka President Rule ne ban pynlong noh da ka General Election,” u la ong.
Haba kren halor ka jingkwah ka sorkar ban tohkit da ka kynhun tohkit ka sorkar pdeng la ka dei ka CBI ne ka NIA u Bah George u la ong ba ka long kaba eh ban shaniah ban tohkit da ka CBI ba ka jingtohkit kan long kaba khuid bad kaba laitluid bad ruh ba haduh lano kan sdang ban tohkit.
“Ka jingartaien ka long ba lano kin sdang tohkit namar kumba long mynta ka sorkar ka dang shu dawa na ka sorkar pdeng ban tohkit da ka CBI hynrei haduh lano kan sdang tohkit ka lah ban shimpor slem bha. Lada phin ong ba ka CBI kan long ka kynhun tohkit laitluid ka long kaba eh ban pdiang namar ka CBI ka dei hapoh ka jingpeit jong ka sorkar pdeng bad ngi tip shai dei ka BJP ba synshar ha Delhi, ha Assam ruh ka sorkar BJP bad ha Meghalaya ruh dei ka sorkar ba thung ka BJP, kumno yn shaniah ïa kata ka jingtohkit ka CBI ba ka long kaba khuid bad kaba laitluid,” u la ong.
U la ong ba kaba donkam ïa ka sorkar ha ka jingshisha ka long ban shu kem beit noh ïa kito ki pulit kiba siat ïap ïa ki san ngut namar ban kem ïa ki nongleh kam sniew ka dei ka sobjek ba la pynkupbor da ka Riti Synshar ka Ri ha ki sorkar jylla ban peit.
“Kaba kongsan eh ïa mynta ka long ba ka tnad pulit hadien ba la dep ban ujor ïa ka ejahar la dei ban pynmih beit ïa ka hukum ban phah kem ïa kito kiba don kti ban siat ïap ïa ki riew paidbah ha shnong Mukroh hynrei kane ka jingkwah ka sorkar ban tohkit CBI ka pyni shai kdar ba u Myntri Rangbah u tieng ban pynibor bad ka sorkar Assam namar u Myntri Rangbah ka Assam u dei uba la thung ïa u Myntri Rangbah ka jylla ba un bat ïa kane ka shuki mynta,” u la bynrap.
U la ong ruh ba ka jingthung ka Assam ïa ka kynhun tohkiti ban tohkit da u nongbishar ba la shongthait ka wanrah ïa ka jingkylli la ka kyhun tohkit ka jylla Assam ka lah ban tohkit ïa ka jingjia kaba jia ha u pud u sam ka jylla Meghalaya.
Haba ïadei pat bad ka kynhun tohkit laitluid ban khlieh da u Justice T. Vaiphei ba la thung da ka sorkar jylla, u Bah George u la ong ba kane ka jingtohkit da ka Judicial Enquiry Commission kan lah ne em ban treikam haba ka pynmih ïa ki rai bad ki jingbthah sha ka sorkar Assam namar jylli ba ka dei peit ka dei beit thik tang na bynta ka jylla Meghalaya.
“Hato ka lah mo ban jam ïa ka jylli ba ka dei khmih namar ka judicial enquiry commission ka dei tang ïa ka jylla Meghalaya ym shuh ïa ka Assam,” u la buh jingkylli.