Nongpoh, Naiwieng 28 : Ka Western Ri Bhoi Dorbar kum kawei na ka kynhun ki riew rangbah ha ka thaiñ Ri Bhoi Sepngi ha Ri Bhoi District ka la pynpaw ka jingsngewkhia kaba jur halor ka jingbym poi bording thikna sha ki Shnong ba hap ha ka thaiñ Patharkhmah bad Jirang bad kane ka jingbym poi bording thikna ka la pynjynjar ïa ki paidbah Nongshong shnong ba bunsien ki hap ban shong hapdeng ka jingdum.
Haba kren sha u Nongthoh Khubor, u President ka Western Ri Bhoi Dorbar, u Bah Najim Kharmalki u la ong ba na ka liang ka Western Ri Bhoi Dorbar kam banse ban kren halor kane ka jingeh ki paidbah, namar wat ha kane ka por ba ym don slap ne lyer ki paidbah ki hap ban shong ha ka jingdum na ka daw ka jingbym poi thikna ka bording ilketrik.
“Kiba bun ki paidbah ki ju kren bynñiaw bad khamtam ki kmie ki kpa bad ki khynnah skul, ha kaba ha kane ka por ba bun ki khynnah hap ban thoh ïa ki eksamin bapher bapher bad ka jingbym poi bording thikna pat ka la ktah wat ïa ka jingkhreh kot ki khynnah skul” ong u Bah Najim Kharmalki.
U la ong ruh kaba kham sgnewsih ha ka por ba ym don ka bording ilektrik ki la ju phone ne pyntip ruh sha ki nongpeit nongkhmih ka tnad MeECL bad bunsien kim ju ioh satia ban ïa kren bad kaba kham sngewsih ka long ba u don u SDO ba peit ïa katei ka thaiñ bad kim don pat kata ka ophis treikam ba pura khnang ba ki paidbah kin wan ujor ne pyntip ha ka por ba ym poi kata ka bording ilektrik.
U la kynthoh ruh da kaba ong ba ha ka por slap ne por lyer ki ju ai daw ba kim lah ban pynbiang bording na ka jingktah ka bor mariang bad kaba kham sngewlyngngoh ruh ba wa ha kane ka por rang bad ym don u slap ka lyer bad ki paidbah katei ka thain da ki spah tylli ki shnog ki ju mad ïa ka jingjynjar na ka jingbym poi thikna ka bording ilektrik.
Namarkata, na ka liang ka Western Ri Bhoi Dorbar ka kyntu ïa ka sorkar bad ka tnad MeECL ba kim dei ban shu leh sting ïa kane ka jingeh ki paidbah ha katei ka thaiñ, namar baroh kiba pyndonkam ïa ka bording ilektrik ki hap ban siew ïa ka bai bnai sha ka tnad MeECL bad kumno pat ki paidbah kim ju ioh thikna ïa ka bording ha kaba kane ka la pynbitar bad pynsgewsih ïa kiba bun ki nongshong shnong jong ki shnong bapher bapher ba hap ha Ri Bhoi Sepngi, u la bynrap.
