Nongstoiñ, Naiwieng 28: Ka HYC North West Khasi Hills District, hadien ba ka la ïoh ka jubab RTI na ka Ophis u EE PWD Mairang Eastern West Khasi Hills District, halor ka jingtrei torti ïa ka surok Mairang Bye Pass kaba 2 kilometer kaba la pyntrei da ka RLT Construction, kumba ka Seng ka la lap da la ki jong ki khmat ïa ka jinglong jingman jong katei ka surok bad kumba long mynta katei ka surok ka la sdang ban jot bad pra jan man la ki jaka.
Kumta na ka liang ka Seng kumba ka la dep ban ïathuh sha ki lad pathai khubor ban mudui syndon da ka PIL sha ka ïing bishar ba don burom jong ka Jylla. Ka seng ka la ong ba kaba sngew thamula ka long ba lada ïaid mynta ïa katei ka surok la ïohi ba la sdang ban syrdep ha ki katto katne ki jaka ba la jot.
Na ka liang ka Seng katba ka dang pynkhreh ïa ki kot ki sla ban leit sha ka ïing bishar badon burom, ka la buh ruh ka jingthoh sha u DC ka Eastern West Khasi Hills District Mairang, ban kyrpad ruh ïa u ba un tuklar lem halor kane ka jingpyntrei torti ïa katei ka surok.
Na ka liang u Deputy Commissioner ka Easten West Khasi Hills District u la shimkhia ïa kane, da kaba u la khot syndon ïa u EE ka PWD (R) Mairang Division ryngkat bad ïa ka Seng. Ha ka jingïakynduh lang jong ka Seng, u DC ryngkat ka ophis PWD ki la shim ïa ka rai ban leit jngoh ïa katei ka surok ha ka 9 tarik mynta u bnai.
Na ka liang ka HYC ka ai khublei kyrpang ïa u bah W.Nongsiej IAS Deputy Commissioner ka Eastern West Khasi Hills District, halor ka jingshimkhia jong u halor kane ka jingkyrpad ka Seng ban leit jngoh ïa katei ka surok.
