Nongstoiñ, Naiwieng 28: Ka mat jingdawa jylla ban ïoh ïa ki jylla ba thymmai ka la sdang ban shongshit biang ha kine ki sngi naduh ba ki nongïalam jong ka National Federation of New State ki la wan ban ïa don ryngkat ha ka jingïalang kaba la pynlong da ka Garoland State Movement Committee ha kada Teteng aja ha nongbah Tura ha ka 29 tarik jong u bnai Risaw ba la dep.
Naduh katei ka sngi ki nongïalam jong ka GSMC, HSPDP, Bodo land, Gurkha land, Tripra Land, Kuki state, Budelkhand, Purbanchal ha ka jingïalang kaba khatduh kaba la pynlong ha ka hall ha Rickman Hotel, ki la ïakut ba ha shuwa ba kin leit ban pynlong ïa ka jingïakhih ha u bnai Nohprah ha nongbah Delhi ha madan Jantarmantar da kaba shong kyllaiñ myngngor, ki la ïakut ruh ba ha shuwa ba kin leit sha Nongbah Delhi, kin pynlong biang ïa ka jingïakynduh lang sa shisien pat ban pynbeit ïa ka por ba kin mih bad ïa ki dkhot ki ban leit ïashim bynta ha katei ka jingïakhih.
U bah K.P.Pangñiang President rangbah ka HSPDP, u la ong ba hadien ba u la wan phai na ka jingïalang kaba la long ha Tura, na ka liang ki nongïalam ka GSMC bad kiwei kiwei ki kynhun kiba la ïadon lang hapoh ka shatri jong ka National Federation of News State, ki la pyntip ha u ba ki kwah ban ïakynduh biang sa shisien ban ïatai sani halor ki mat kiba don kam ha shuwa ba kin leit aiti sha ka Dorbar Lok sabha ba kan pynsngew sha ka ri India halor ki mat jingdawa.
U la ong ruh ba kitei ki para dkhot kiba la don hapoh ka lama jong ka NFNS ki la pyntip ruh ba ki kwah ban pynlong ïa katei ka jingïakynduh lang jong ki ha kano kano ka jaka kaba hap hapoh Khasi Jaiñtia Hills hynrei kam dei pat ha ka Nongbah Shillong.
U bah Pangñiang u la ong ruh ba hadien ba ki la pyntip ïa kata na ka liang ka HSPDP ka la pynbeit ba ïa katei ka jingïakynduh lang kin pynlong ha ka 30 tarik mynta u bnai ha ka shnong Mawphanlur, kaba dei kawei na ki jaka jngohkai ba itynnad bad kaba la biang ki jaka sah na ka bynta kiba wan sah miet, kaba dei ruh ka shnong ha kaba la tei ïa u mot sah jingkynmaw ïa u (L) Maieit Hopingstone Lyngdoh u nongprat lynti halor ka jingdawa jylla la ka jong kata ka Khasi Jaiñtia State.
Ha kaba ïa dei bad ka jingsdang shongshit biang jong ki paitbah nongshong shnong na Garo Hills, ban dawa la ka jong ka jylla la ïoh ban ïakren bad u bah Nickman Marak Chairman jong ka Garo land State Movement Committee, ha kaba u la ong ba ka jingdawa ban ïoh la ka jong ka jylla na ka bynta ki paitbah Garo, kam dei shuh ka jingdawa kaba dang thymmai, hynrei ka dei ka jingdawa kaba la slem bha kaba la maitphang nyngkong eh da u (L) Pa Purno Sangma u ba la rah ruh ïa kane ka mat haduh ka ïngdorbar Parliament jong ka ri India.
U bah Marak u la ong ruh ba ha kine ki snem kiba la dep, ki paitbah nongshong shnong ka ri lum Garo kim pat da sngewkhia bha halor katei ka mat jingdawa. Hynrei naduh ka 29 tarik jong u bnai ba la dep hadien ba uwei na ki nongïasaid aiñ jong ka Supreme Court ba don burom u ba la ih bha ha ka kam, u ba dei ruh uwei na ki nongïalam ha ka jingïakhih ban dawa jylla ba thymmai ïa ka Telegana bad ruh ka jingpynshai jong u Professor Munish Tamang President ka NFNS, ki la sngewthuh shai ba ki la donkam ban ïoh noh la ka jong ka jylla bad dei hadien ka jingwan jong ki ba katei ka mat jingdawa ka la rung lut ha man kawei pa kawei ka thliew ïing ha baroh kawei ka ri lum Garo.
Haba ïakren pat bad u bah Agustine Marak CEM barim ka Garo Hills District Council, u la ong ba um lah khlem da ai ka burom ïa ki ar ngut ki nongïalam kiba la leit noh kata u (L) Clifford Marak u nongseng jong ka Garo National Council (GNC) bad u (L) bah Hopingstone Lyngdoh, u nongseng jong ka Hill State People Democratic Party (HSPDP) kiba la ïa saiñ dur bad mynjur ban buh ïa katei ka jingdawa kum kawei na ki mat trei kam jong ki ar tylli ki party kata ka GNC bad ka HSPDP.
U bah Agustine u la ong ruh ba haba phai ha katei ka mat jingdawa, ym lah ban len ba kitei ki nongïalam kiba la pruid dak ïa katei ka mat kaba donkam, ki la ïa mynjur lang ruh ba lada jia ba katei ka mat jingdawa kan urlong, kam dei ban don kano kano ka jingsngewïapher jaitbynriew.
Hynrei ka jingïalong kawei kan neh bad kin ïakhlad da kaba suk ba saiñ khlem kano kano ka jingsngew buhkhoh bad ki jaka ki puta u pud u sam jong ka Khasi Jaiñtia state bad Garoland State kin long kumba ju long bad kan ym don ruh kano kano ka jingïatuklar ha kaba ïadei bad ki jaka ki puta.
