Sdang wan phai ka shongsuk shongsaiñ ha jylla hadien ka jingshah siat ïap ki 6 ngut ha Mukroh

Shillong, Naiwieng 27 : Hadien kumba 5 sngi ka jingkyan jong ka jingïa kynad ha ka jylla khamtam ha kane ka nongbah Shillong namar ka jingkiew bitar ki Seng Bhalang bad ki paidbah ïa ka jingshah siat iap pathar ki san ngut ki nongrep ka jylla bad uwei u forest guard ka Assam ha ki pulit ka Assam ha ka step 22 tarik Naiwieng 2022 ha Mukroh, mynta ka shongsuk shongsaiñ ka la sdang ban wan phai biang ha ka jylla.
Kane ka jingwan phai ka shongsuk shongsaiñ ka long khamtam hadien ba ki seng bhalang hi naduh ka KSU bad kiwei kiwei ki la pynshai ba kane ka jingïaleh kam dei pyrshah jaidbynriew Assam ne Khasi hynrei ka dei pyrshah ïa ka sorkar Assam bad Meghalaya namar kane ka jia dei namar ba kim shim khia ban pynbeit kloi ïa u pud u sam.
Nalor kata wat ka sorkar pdeng ruh ka la mynjur ban thung jingtohkit da ka CBI halor kane ka jingjia hadien ka jingïakynduh jong u Myntri Rangbah u Conrad K Sangma bad ka Kynhun Myntri ïa u Amit Shah Myntri kam pohïing ka ri ha nongbah Delhi. Ka sorkar jylla ruh ka la thung ïa ka Speicial Investigation Team (SIT) ban dang pynïaid shakhmat ïa ka jingtohkit ba la khlieh da u DIG Eastern Range.
Haba ïakren bad u nongthoh khubor u Deputy Commissioner jongka West Jaintia Hills u bah Batlang S Sohliya u la ong “ Ka jinglong jingman ka suk ka saiñ ha ka District ka la ïaid beit bad ka burom ka leit sha ki paid nongshong shnong ka district bad wat ki seng bhalang hi ruh kiba pyni ïa ka mynsiem ba jai jai , ïai shah bad rangbah ki jingmut jingpyrkhat halor kane ka jingjia. Hooid baroh ngi ïa sngewsih ïa kane ka jingjia hynrei ki paid ka West Jaintia Hills ki pynpaw ïa ka jinglong rangbah bad jai jai jongki namar kim shym la thaw kino kino ruh ki jingkulmar wat la ka jia hapoh ka district ruh”.
“ Ym donjingkulmar, ym don jingpynjulor bad ym don kano kano ka jingpynthut ïa ki paidbah namar kum ka District ka don hapdeng ka jingsngewsih halor ka jingjia bad kumta ki paidbah kim kwah ban leh ïa kino kino ki kam pynkulmar” ong biang u bah Batlang.
“ Wat ki Seng Bhalang bapher bapher ruh ki pynpaw ïa ka jinglong jai jai bad rangbah ka jingmut jingpyrkhat jongki namar baroh ngi ïa sngewsih halor kane ka jingjia ba sngewsih kumta ki riew shim kabu ruh kim ïohlad ban leh ïakino kino ki kam kiba pynthut ïaka suk ka saiñ. Nalor kata ki bor pulit bad ki Majistor ruh ki long kiba peitngor bha ban lait na kino kino ki jingjia ba sngewsih” ong biang u bah Batlang.
U la ong lait noh na ka 25 tarik ba ki Seng Bhalang ki khot pynlong ia ka Non Cooperation Movement ban pyrshah ïa ka jingjia baroh ki long kiba ïaid beit bad kine kiei kiei baroh ki dei ki jinglong jai jai bad don burom jong ki briew ka West Jaintia Hills bad halor kane na ka liang u DC u ai khublei kyrpang ïa ki paid nongshong shnong ka West Jaintia Hills.
U la ïathuh ruh ba baroh kiba la shah siat iap la dep pyndep ïa kaba sah jongki ha la ki jingleh niam kat kum ka jingngeit jongki ïa kaba la wan ban synran da ki paralok parajor, ki ba haïing hasem kiba na jan bad na jngai ruh. Ki bor synshar district ki ïadon ryngkat ruh ban peit ba ka jingpyndep kan long kaba don burom. U la ïathuh ba un sa hiar biang sha Mukroh ha ka Lah Sngi U Blei ban leit aiti ïa ka cheque sha kawei ka long ïing bym pat ïoh ai da u Myntri Rangbah namar la pynkit noh ïa ka met jong u sha ka shnong Sanaro ban pyndep ïa kaba sah ha katei ka shnong.
U DC u la ïathuh ruh ba u la dep ïakren bad ka DC jongka jongka West Karbi Anglong ba kan shim khia ban peit ban ym don kano kano ka jingpynthut ïa ki nongrep kiba leit ban ot kba namar kiba bun ki lyngkha kba ruh ki don ha ki jaka ba don ka jingïakajia bad ka Assam bad na ka liang jong ka ruh ka la kular ba kiei kiei baroh kin ïaid beit.
Ha nongbah Shillong ruh ym shym la don shuh kino kino ruh ki jingjia ba sngewsih kat haduh ba thoh ïa ka khubor. Ki kali Assam ki la wan kiew sha Meghalaya bad na Meghalaya ki la hiar sha Assam. ïa ka Internet ruh lah ban pyllait noh naduh ka por 10.30 jongka Lah Sngi U Blei.
Tang kawei kaba ki paidbah ki ud bad lyniar ka dei ka jingbym don pisa ha ki ATM namar ki Bank baroh ki khlem phah thep pisa ei ei ruh em lah bun bun sngi mynta.