Shillong, Naiwieng 25: u Myntri Rangbah ka jylla, u Conrad Sangma mynta ka sngi, u la ïakynduh ïa u Chairperson jong ka National Human Rights Commission, u Justice Arun Kumar Mishra ha ka jingïadon ryngkat lem kiwei ki dkhot ka Commission.
U Myntri Rangbah u la ïathuh ba ha kane ka jingïakynduh u la ïathuh ïa kaei kaba la jia ha Mukroh ha ka 22 tarik bad u la ong ba kane ka jingjia kadei beit ka pynkheiñ ïa ka hok longbriew manbriew.
U la kyntu ïa ka NHRC ba kan shim jingpynshitom halor kane bad ban ai ka jinghikai ruh ïa ki bor Pulit kiba dei ban pahara ha ki jaka khappud. U la pyntip ruh halor ka jingkwah ka sorkar jylla ban tohkit ïa kane ka jingjia da ki bor tohkit ka sorkar pdeng kum ka CBI lane da ka NIA.
Ha kane ka jingïakynduh la don lang ruh u Symbud Myntri Rangbah, u Bah Prestone Tynsong.
