ïaynduh ki nongñiah kali kamai ka jylla Meghalaya bad Assam

Shillong, Naiwieng 25: Ki nongñiah kali kamai na Shillong sha Guwahati ne Guwahati sha Shillong hapoh ka shatri ka Ïai Tylli Tourists Owner and Driver Association ha ka sngi Thohdieng ki la shong jingïalang bad ka seng ki nongñiah kali na Guwahati ha kaba ïadei bad ka jingshah pyrkhing ka rung ka mih na ne sha ka jylla Meghalaya ha ki pulit assam.
Ha kane ka jingïalang kine ki nongñiah kali ki la rai ba wat ka don ka jingpyrkhing ka rung ka mih hynrei ban pynsuk ïa ki paidbah kiba sah kut sha ka jylla Assam ne ha ka jylla Meghalaya ki la rai ban pynpoi ïa kine ki nongleit nongwan ha Jorabat bad ba ki kali Assm ne Meghalaya kin kit ban pynpoi pat ïa kine ki nongleit nongwan sha ka jaka ba ki thmu ban leit, ïathuh u Secretary ka seng u Balajied Jyrwa ha ka jingïakren bad ki nongthoh khubor.
U la ïathuh ruh ba kane ka jingpyrkhing ka dei beit na ki pulit Assam ha kaba ki la ai ruh ka jingmaham ba lada rung sha Meghalaya ne mih na Meghalaya ki dei ban shim jingkit khlieh hi lada jia eiei.
Na ka liang kine ki ar kynhun ki la buh ïa ka jingkyrpad sha ki sorkar jylla ba kidei ban pynbeit noh mardor bad leh eiei ha kaba ïadei bad kane ka jingïakulmar bad u la ong ba namar ïa ki ruh kam don ka jingshong shngaiñ lada ki leit sha Assam, u la ïathuh ruh ba ki la don katto katne ngut napdeng ki nongñiah kali na Meghalaya ki la shah ktah kti ha Assam bad la shah pynpait pynpra ïa ki kali jong ki.
Shuh shuh u la ong ba ka jingbymdon ki pulit ka jylla ha Jorabat ka pynshong syier shikatdei ïa ki nongñiah kali jong ka jylla bad ïathuh katba na ka liang ka Assam pat ka don beit ki pulit jong ka ha baroh 24 kynta.
“Ngi sngew syier bha namar ym don pulit na ka jylla jong ngi ha katei ka jaka katba na ka liang pat ka Assam ka don pulit beit ha katei ka jaka. Shuh shuh ngi ïohi ba na ka liang ki pulit ka jylla ka ai jingpahara kyrpang ïa ki kali Assam ba mih na ka jylla ne ban wan sha ka jylla katba na ka liang jong ka jylla pat kam shym la ai pulit pahara ïa ngi” u la ong.
U la ong ruh ba kane ka jingshah pyrkhing ka rung ka mih ki kali na ka sorkar Assam ka pynlong ba palat ïa ka lai hajar malu mala ki trai jylla kiba mut wanphai sha Meghalaya ki sahkut ha Assam.
U la ïathuh ba na ka liang jong ki ki la rai ban ai dorkhas ha ka sorkar jylla bad ka sorkar Assm ba ka dei ban weng noh shisyndon ïa kane ka jingeh lymkumta na ka liang jong ki kin sahngeh syndon ban kamai.
Haba jubab la ka jingpyrkhing ka dei na Meghalaya ne Assam, u Bah Balajied u la ïathuh ba ka jingpyrkhing ka long beit na ka sorkar Assam hadien ba na ka liang jong ka ka la buh ruh da ka jingmaham ba kiba leit sha Meghalaya na ka jylla Assam ne Assam sha Meghalaya ki dei ban kit khlieh hi ym ka sorkar Assam lada jia eiei.