Shillong, Naiwieng, 25: Ki bor synshar ka East Khasi Hills District ha ka sngi Thohdieng ki la kular ïa ki nongïalam jong ka Hynñiewtrep Integrated Territorial Organisation (HITO) ban pynïakynduh bad ki Ophisar ka Jylla Assam ha Assam House, kaba don ha Dhankheti, Shillong lashai ka sngi Saitjaiñ na ka bynta ban ïakren sani ha kaba ïadei bad ka shongsuk shongsaiñ ha nongbah Shillong hadien ka jingshah siat ïap jong ki san ngut ki nongshong shnong jong ka shnong Mukroh ha ki Pulit Assam ha ka step jong ka 22 tarik u Naiwieing, 2022.
U President ka HITO u Bah Donbok Dkhar ha ka jingïakren bad ki lad pathai khubor u la ïathuh ba ka jingïakynduh bad ki ophisar ka Sorkar Assam ha Assam House kan long ha shwa ka jingthang mombati ha phyllaw ka State Central Library, Shillong naduh ka por 3:00 baje nohphai sngi.
“Ka jingpynlong ïa ka ‘Red Flag Rally” ka long katkum ka jingbthah jong ki bor synshar distrik,” ong u Bah Dkhar.
U la ïathuh ba ka jingpynlong ïa kane ka jingthang mombati ha ka sngi Saitjaiñ na ka bynta ban sngewlem ïa ki san ngut ki lanot jong ka shnong Mukroh ka long hadien ba la ïoh ïa ka jingud jingnam na kiba bun ki paradoh parasnam ba ki khynmnah skul ki dang don hapdeng ka eksamin kut snem bad ba ki don ruh ki samla kiba pule bad kiba trei shabar ka jylla.
“Ngi la pyrkhat bha ba ka jingïakhih ka dei ban don ïa u soh jong ka jingjop bad dei halor kata ka nongrim ngi la rai ban ïakren sngewthuh (bad ki ophisar jong ka Sorkar Assam) khnang ba ka ding kan ym klang sha Assam kumba la ka jia hynnin haba ngi la shah tynjuh ha kaba ïadei bad ka jingpynbna jong ka Assam Mazdoor Petroleum Union (AMPU) ban sangeh noh ka jingwan kit ïa ka umphniang Petrol sha Meghalaya,” la ong u Bah Dkhar.
“Ngi la ïakren lyngba ka telephone bad u President ka AMPU bad ngi la kular ban ai jingïada bad ngi la ïoh ruh ba u Director ka Food, Civil Supplies u Pravin Bakshi u la bthah ïa ki Deputy Commissioner bad ïa ki Superintendent of Police jong ki District ban ai jingïada ïa ki trok kit umphniang Petrol kiba wan na Assam,” la ong shuh shuh u Bah Dkhar.
“Ngi kyntu ïa ki paidbah ba kim dei ban tieng ne ban syier mynsiem namarba kum ki khun samla jong ka Bri u Hynñiewtrep ngi kwah ïa ka shongsuk shongsaiñ ha ka jylla bad ngim kwah ïa kano kano ka jingkulmar ha ka shnong ka thaw bad ngi maham ruh ïa ki riewshim kabu ha ka kyrteng ka seng ban leh ïa kino kino ki kam pynkulmar,” la ong une u President ka HITO. “Ngi kyntu ïa ki nongshong shnong ha ka jylla ba kin plie beit ïa ka dukan lashai ka sngi thang mombati bad nga kyntu ïa ki ban ïasnohkti lang da kaba jaijai,” la kyrpad u Bah Dkhar.
