Pynsted ka jingtohkit halor ka jingshah siat ïap ban paw ka hok bad jingshisha: MTDF

Shillong, Naiwieng 25 : Ka Meghalaya Torism Development Forum (MTDF) ka pynrem jur ïa ka jingsiat pathar jong ki pulit Assam ha Mukroh, West Jaintia Hills ha kaba hynriew ngut ki mynsiem briew ki la duh ei ïa ka jingim jongki. Ka Seng ka phah ka jingsngewlem halor kane ka jingjia sha kiba haïing hasem bad kumjuh ruh ka pynpaw ba ka ïadon ryngkat bad ki paid nong shong shnong ka Mukroh kiba la mad ïa kane ka jingjia ba sngewsih tam. Ka duwai ruh ba ki mynsiem jong kine kiba la khlad kan ïoh shongjah thait junom. Ha kajuh ka por ka MTDF ka dawa ba ka sorkar Assam bad Meghalaya ki dei ban pynsted ban pynbeit ïa u pud u sam khamtam eh ban pynsted ka jingtohkit khnang ba ka hok bad jingshisha kin paw. Ka seng ka kit bok kit rwiang ruh ïakiba mynsaw jur ba kin nang ïoh bor na ka sngi sha ka sngi.
Ka Forum ka kwah ruh ban pynpaw ba ka kyrshan ïa kaei kaba ki seng bhalang ki dawa hynrei ha kajuh ka por kum ka kynhun kaba peit ban kyntiew ïa ka kam jngohkai pyrthei bad kiwei kiwei ki kam kiba don ka jingiadei bad kane ka kam jngohkai, ka kyntu ïa baroh ban kiar na kino kino ki jingïaleh kiba wanrah ka jingbym shngaiñ ha ka jylla namar ka ktah ïa kane ka kam jngohkai pythei khamtam ha ki jaka nongkyndong.
Ki jingjia ba dang shen ha kane ka nongbah ki la ktah jur ïa ka kam jngohkai sha ki thaiñ nongkyndong bad wat ïa ki trai jong ki Homestay, ki trai dukan, kito kiba kamai kyndoi jakpoh na kane ka kam na kaba die jingdie bad kiwei kiwei. Nalor kane ka ktah ruh ia ki kali kamai, ïa kiba die jingdie ha ki jaka ba don ki jaka jngohkai. Ka la don ka jingduh nong kaba khraw ha kine ki arsnem lynter na ka daw ka khlam COVID kumta lada thut sa ka suk ka saiñ kan dang ktah dang ktah shuh shuh bad kiba shah ktah jur ki dei ki paradoh parasnam sha ki thaiñ nongkyndong kiba la pynlut ïaka pisa tyngka jongki na ka bynta ban kyntiew ïa kane ka kam.
Ka Meghalaya ka long ka jylla kaba la paw nam bha ha pyrthei kum kata ka jaka jngohkai kaba itynnad tam bad khring bha ïa ki nongwan jngohkai ha kine ki khyndiat snem hynrei lada don kine ki jingkulmar bad jingthut ka suk ka saiñ ka shim por bha ba ki nongwan jngohkai kin nud bad shngaiñ ban wan sha ka ne ka jylla bad kan shim por bha ruh ban khyllie ïa ka burom ba la jah.
Kumta ka MTDF ka kyntu ïaki seng bhalang ban ailad ba ka aiñ kan leh ïa kaba donkam shwa ban ïaid shakhmat da kino kino ki jingïakhih pyrshah namar kane ka ktah jur bha ïa ka kamai kajih ki nongshong shnong khamtam sha ki thaiñ nongkyndong kiba kamai kyndoi jakpoh na kane ka kam. Ka Forum ka kyntu ruh ïaka tnad Tourism ba kan buh kyrpang ïa ka hotline number ban ioh pyntip kyrkieh haba donkam khnang ban ïoh phah jingïarap kloi kloi sha kino kino ki nongwan jngohkai kiba donkam ka jingïarap ba kyrkieh kiba wan sha kane ka jylla Meghalaya namar kane kan ïarap shikatdei eh ha ka por ba donkam tam. Kane ka long kat kum ka kyrwoh ba la pyllait da u Chairman ka Rural Tourism Committee, MTDF bah Aiban S Mawkhroh.