Da ka jingthang mombati pynlong ka TMC Pynursla halor ka jingjia ba sngewsih ha Mukroh

Shillong, Naiwieng : Ka Pynursla Block Trinamool Congress ha ka miet sngi Balang ba la lah ka la pynlong da ka jingthang mombati ha ka parking lot hajan ka ïew Pynursla ha ka jingïadon lang ki nongkitkam ba hakhmat jong ka party nalor ki riew paidbah shibynta ban pynpaw ka jingsngewlem na ka bynta ki paradoh parasnam kiba shah siat ïap ha ki pulit ka Assam kaba la jia ha ka shnong Mukroh.
Ha katei ka janmiet la sdang shwa da ki kyntien lamphang na u Bah Dominic S.Wankharu uba dei u General Secretary ka TMC Pynursla Block bad uba long ruh u District Coordinator jong ka East Khasi Hills.
Ha ka jingkren utei u samla rangbah u la ther bad pynrem jur halor ka jingjia shah thombor ba shyrkhei kaba la wanrah ka jingsngewsih kthang ha ka shnong Mukroh kaba don hapoh ka Laskeiñ Block, West Jaiñtia Hills District.
Ha kajuh ka por u la pynrem tyngeh halor ka jingleh bym suitñiew jong kitei ki pulit ka sorkar Assam da kaba shu siat khlem kano kano ka jingmaham lane ban pyndonkam da ka lynti ban ïakren, hynrei ki lah shu siat beit naphang khlem kheiñ shuh ïa ki longkmie, ki samla ne rangbah briew kaba la shim ïa ka jingim jong ki 5 san ngut ki mynsiem ba kordor jong ki para ri.
Halor kane ka jingjia ula dawa ba ka Sorkar MDA kam dei ban ailad ïa ka Sorkar Assam ba kan shu wan ïuhroit lane kheiñ dew thala ïa ki paid nongshong shnong jong ka Jylla bad khamtam jong ka Bri U Hynñiewtrep. Ha katei ka janmiet la don ruh ka jingsngap jar ba lai minit kum ka dak ka jingsngew lem na ka bynta ki mynsiem ba la khlad noh bad hadien la bud ruh da ka jingkren na u Bah Edmund Khongngai uba dei u State Vice President ka TMC Youth Congress Committee bad uba long rung u kyrtong u ban ïa aireng pyrshah ïa ka NPP ha kane ka elekshon ka ban sa long ha u snem 2023.
Na ka liang une u samla rangbah u Bah Edmund Khongngai ula ai khublei ïa ki paidbah jong ka shnong Pynursla kiba la wan shim bynta ha ka jingïalum lang ban pynpaw ka jingdiaw bad ka jingpyrshah ïa ka jingleh ka Sorkar Assam. U la ong ba kane ka jingjia ka dei ban kyrsiew thiah ïa uwei pa uwei u paid Khasi Pnar na ka jingma ba ap lada ngin dang shu pyrkhat tang ïalade shimet khlem da phaikhmat lem ïa kito kiba sah ha ki thaiñ khappud hajan ka Jylla Assam bad kumjuh hajan ka khappud bad ka Ri Bangladesh.
Shuh shuh ula ong ruh ba ka jingjia ha katei ka shnong Mukhroh ka pynkynmaw ïa u ba ha ka por kum uwei na ki nongïalam seng bhalang ha ka thaiñ Ri War Mihngi Pynursla, u la juleit jngoh ban ïasaid na ka bynta ki paidbah kiba sah hajan ki thaiñ khappud namar ki ju shah pyndik bad shah thombor ha ki bor ka Ri Bangladesh bad kum kine ki jingjia ki ju mih khah khah na ka por sha ka por bad kat haduh kine ki sngi.Kane ka long katkum u kyrwoh lyngba u Bah DS Wankhar, General Secretary Trinamool Congress Committee Pynursla Block.