Naiwieng 25 : Ka Synjuk Ki Rangbah Kur Ka Bri-Hynniewtrep ka pynpaw ïa ka jingsngewsih kaba khraw ban ïohi ba hynriew tylli ki mynsiem briew kila duh ei ïa ka jingim ha kti ki pulit kajylla Assam ha ka jingsiat pathar ïa ki riew paidbah ha shnong Mukroh ha West Jaintia Hills District ha ka 22/11/2022 mynta u bnai, ka synjuk ka pynrem jur ïa kito kiba don kti ban siat ïa ki riew paidbah.
Ka seng ka phah ïa ka jingsngewlem sha kiba ha ïing ha sem jong ki san ngut kiba khlad kiba dei na ka shnong Mukroh, ha kajuh ka por ka duwai ba u trai nongbuh nongthaw ba un ai ka jingjah thiat bym juhkut ïa ki mynsiem kiba la khladnoh.
Halor katei ka jingjia ha ka shnong Mukroh la ïoh lyngba ki lat pathai khubor ba ka sorkar Meghalaya bad sorkar Assam kila dep ban ïa kren bad u myntri kam poh iing u Amit Shah ban phah tohkit ha ka Central Bureau of Investigation (CBI).
Na ka twitter jong u myntri rangbah u Conrad K Sangma kala paw shai kdar ba u mytnri Kampoh iing ka sorkar pdeng u Amit Shah u la kubur ban phah tohkit ha ka CBI halor ka jingshah siat ki riew paidbah ha shnong Mukorh.
Ka Synjuk ka kyntu ïa ki samla ka Ri ban long kiba jai jai bad rangbah ban kiar na ka jingïa umsnam namar kam pynpoi shano shano bad ka shu buh jingeh pynban ïa ki ba duk ba rangli. Ngi kyrmen skhem ba ka jingtohkit da ka CBI kan long kaba ai jinghun ïa baroh.
