Shillong: Ki samla kiba ladep ban thoh ïa ka eksamin wad kam Pulit ki la leit ban pan jingbit na ka Deputy Commissioner jong ka East Khasi Hills District ban ïaid paidbah ha ka 30 tarik mynta u bnai, kata, ha ka sngi Balang.
U Bah Diben Lyngdoh bad u Bah Shine Marweiñ haba kren ha ki lad pathai khubor ha ka sngi Palei ki la ong ba ki la pan jingbit na ka Deputy Commisisoner jong ka East Khasi Hills District ba kin ïaid paidbah ha ka 30 tarik mynta u bnai ban dawa na ka Sorkar ba kan pynbna noh ïa ka result thepkam Pulit.
Ka Sorkar ka la khot ïa ka aplikeshon naduh u snem 2019. Ïa ka jingpynmareh la pynlong ha u Naiwieng 2021 bad ïa ka eksamin la pynlong ha u bnai Rymphang 2022, hynrei haduh mynta ka Sorkar kam pynmih ïa ka result.
Ka jingkwah jong ki samla thep kam ka long ba ka Sorkar ka dei ban pynmih noh ïa ka result kaba ki ladep ban thoh. Ki la buh jingkylli ruh ba balei ka Sorkar kam lah ban pynmih ïa ka result mynta la jan shisnem kaba la buh ïa ki samla wadkam ha ka jinglynga.
