24 tarik .. u perol bomb bad ki tear gas, 25 tarik sngi pep trei .. 26 tarik ka sngi rah lama saw

Shillong, Naiwieng 24: Ka jylla, khamtam ki bynta jong ka Rilum Khasi Jaiñtia ka la shah ktah bad kan shah ktah jur namar ka jingsiat dusmon ki Pulit Assam ïa ki Para Ri ha Mukroh ha ka 22 tarik mynta u bnai.
Mynta ka sngi, hadien ka jingshongkyllaiñ myngngor ki San tylli ki Sengbhalang,kata ka FKJGP, KSU, HNYF, RBYF bad JSU la bthei ka jingïakhih ha kaba la don ka jingkawang Petrol Bomb ïa ka Trok ba kit ïa ki Pulit CRPF hajan Civil Hospital.
Nangta ha ka 25 tarik pat kine kijuh ki San tylli ki Seng kin pynlong ka Non Cooperation Movement ne ka jingïakhih ban khot ïa ki paidbah bad khamtam eh ïa ki nongtrei Sorkar ban pep trei ne ban nym leit trei ha kane ka sngi kum ka dak ban ai jingkyrshan ïa ka jingïakhih na ka bynta ki lanot Mukroh.
Ha ka 26 tarik pat ka Seng HITO kan pynlong da ka sngi rah lama saw ne ka Red Flag Day bad ka jingthang ïa ki dur tyngshop jong ki nongïalam ka Sorkar,kata u Myntri Rangbah, u Conrad Sangma bad u Myntri Rangbah Symbud, u Prestone Tynsong.
Ka Red Flag Day jong ka Seng kan sdang na Madan Ïewrynghep, Laitumkhrah ha ka por 3 baje nohphai sngi bad bud pat ka jingïaid paidbah sha Dhankheti ha kaba yn pynlong ïa ka jingthang mombati kum ka dak ban sngewlem ïa ki mynsiem ba la khlad ha Mukroh na ka jingsiat pathar ki Pulit Assam ha ka 22 tarik mynta u bnai.