Shillong, Naiwieng 21 : U Myntri Rangbah ka jylla, Conrad K Sangma ha ka step sngi Ba-ar u la plie paidbah ïa ka Shillong Literary Festival kaba la pynlong ha Nan Polok, Shilong.
Haba kren ha katei ka jingïalang, u Myntri Rangbah u la ong ba kum ka sorkar ki don ruh ïa ka thong ban don noh da ka calendar kaba man u snem hynrei na ka daw ka jingwan ka khlam COVID ki la sdang noh pat naduh u snem ba ladep.
“Tangba ka la kiew bun pat lada nujor bad kaei kaba long ha ka sien kaba nyngkong ha u snem ba la dep. Kumta nga kyrmen ba katba nang ïaid ka por kane ruh kan long kawei na ki tamasa kaba paka bha ym tang ha India hynrei wat ha ka pyrthei hi baroh kawei,” u la ong.
U Myntri Rangbah u la ong ruh ba ka Literary Festival ka long ruh ban ai lad kyrpang ïa ki nongthoh, bad khamtam ban ai mynsiem ïa kito ki samla nongthoh ba dang khie kynthup ïa ki samla pule ba kin don ïa ka jingmlien ban pule bad thoh khnang ba kin kylla long ki nongthoh kiba khraw.
“Lyngba kane ka festival kan plie lad ruh ïa ki ban kynduh ïa ki nongthoh ba khraw, ban ïa kynduh bad ïohsngew markhmat na ki bad kumta kan long ka rynsan kaba paka tam kaba phin kynmaw junom nalor ba kan pynwan dur ruh wat ïa ka jingmut jingpyrkhat jong phi,” bynrap biang u Myntri Rangbah.
