Shillong, Naiwieng: Ka State Ophis ka Khadi & Village Industries Commis-sion ha ka 18 tarik mynta u bnai kala pynlong ïa ka ‘Awareness camp’ ha kaba ïadei bad ka “PMEGP Scheme” ha Thadnongiaw Community Hall, Bhoirym-bong Ribhoi District.
Ka jingpynlong ïa kane ka prokram ka thmu ban kyntiew ïa ka ïoh ka kot lyngba ka jingplie lad ha kaba ïadei bad ka jingseng ïa ki kam lajong.Ka mat jong kane ka prokram ka long; “Make Youth Job giver not Job seeker” lane pynlong ïa ki samla ba kin long ki nong ai kam ym ki nong wad kam.
Ha kane ka camp la pynshai ruh ha kaba ïadei bad ka jingpynurlong ïa ka ‘Aatmanirbar Bharat,’ kaba dei ka thong jong u Myntri Rangbahduh ka ri u Narendra Modi ban pynlong ïa ka ri kaba biang na lade.
La pynlong ruh ïa kane ka prokram shibynta ban wanrah shuh shuh ïa ki jingtyrwa kiba kongsan lyngba ka district ka ba don ïa ka jingangnud, kata ka Ri Bhoi District namar ka jingpyntreikam jong ka jylla ha kaba ïadei bad kane ka skhim PMEGP ka duna shibun haba shim kyllum hapoh ka ri.
Baroh kila don kumba 80 ngut ki briew kiba la wan ïashim bynta ha kane ka jingïalang ha kaba la ïa don lang ruh u Mange Ram (Director KVIC, Shillong), ki nongmihkhmat na ka DCIC Ribhoi District, u Bah Osborn Mawthoh (Func-tional Manager DCIC), Kong Grace Suiam (Extention Officer KVIB Ribhoi District), Bah Palash Baruah (LDM State Bank of India, Ribhoi District), Kong Doris Lyngdoh Nongbri (Branch Manager, SBI Bhoirymbong Branch), Bah Jesting Muktieh (u nongïoh jingmyntoi ba jop lyngba ka PMEGP), Bah Karbius Lyngdoh (nong ïoh jingmyntoi ba jop lyngba ka PMEGP ) bad u Bah Rikarlus Sujai, dkhot ka Thadnongiaw Village Council.
Nalor kata kasla don shuh shuh ka jingpynshai kaba bniah ha kaba ïadei bad kane ka skhim bad kumno ban poi sha ka thong ha kine snem 2022-23.