Ka history jong ka Meghalaya bad ki jylla NE kim ju ïoh jaka satia ha ki kot pule: Prof Umesh

Shillong, Naiwieng 17: U Member Secretary ka Indian Council of Historical Research (ICHR) uba long ruh u dkhot jong ka National Council of Educational Research and Training (NCERT) u Prof Umesh Ashok Kadam u la ong ba ka pakit jong ka jylla bad ki thaiñ Shatei Lam Mihngi u la ong ba ka ki kot pule ha skul ha kylleng ka ri India kim ioh jaka satia ban rung kum kawei na ki lynnong ha ki kot pule ha ki skul khnang ba ki khynnah skul kin ioh ban pule ban tip shaphang ka jingjia kiba la jia ha kine ki bynta ka ri ha ki bun bun spah snem ba mynhuwa.
Haba kren kum u Kongsan ha ka National Seminar ba la pynlong da ka Department of History ka St Anthony’s College halor ka phang “Saga of Unsung Heroes of Meghalaya” u Prof Umesh u la kren bynñiaw halor ka jingbym ïoh jaka satia ka pakit jong a jylla bad ka thaiñ Lam mihngi ha kine ki 65 snem ha ki kot pule kumba ki dei ban ïoh.
“Nga dei u member ka NCERT bad nga bynñiaw ban kren ïa kane, haei ka pakit jong ka jylla Meghalaya ne ka Arunalchal Pradesh, ka Mizoram bad ki jylla kane ka thaiñ balei ka NCERT kam ai jaka satia kumba ki dei hok ban ïoh balei ka don mo ka daw,” la ong.
U la ong ba lada ka pakit kine ki jaka kan ïohrung ha ki kot pule yn ym shimpor satia ba kiwei ki bym dei na kane ka thaiñ kin don ka jingsngew syrdoh mynsiem bad kane ka thaiñ, “namarkata ka la donkam ïa ka NCERT kan ai jaka ïa kane” u la ong.
U Prof Umesh u la ai jingmut ruh ba ka NEHU kan don kyrpang kawei ka tnat ban tih bniah ïa ki pakit ka jylla bad ki jylla ka thaiñ Lam Mihngi khnang ba kin ïoh ka jingithuh ym shuh tang kum ka pakit ka thaiñ ne ka jylla hynrei ba kan dei ruh ka pakit jong ka ri ne ka National History.
“Ha ka jingshisha ka NEHU ka don ki riewshem phang kiba kynsai bha bad lada plie ïa kane ka tnat kyrpang ngam artatien ba shibun bah ki moiñ ki manik jong ka pakit ka thaiñ kin sa lah ban sei pyrthei,” u la bynrap. U la ong ruh ba kane ka jingbym ïoh jaka ka thaiñ ha ki kot pule ha skul ka pynlong ïa kiwei ki nongshong shnong ka ri ba kin ym tip eiei ïa kaei kaba la jia ha ka mynnor ha kine ki thaiñ bad kaba pynlong ruh ïa ki ban ym sngew ba kane ka bynta ka ri kam da dei than ka bynta ka ri namar ym ju don ba kren shaphang ka thaiñ. “Kane kawei kaba donkam ba naduh mynta ka sngi sha khmat ba ngi dei ban sngew sarong ïa ka jinglong nong India kiba na ka thaiñ Lam Mihngi ka ri,” u la ong.
U la ïathuh ruh ba na ka liang ka ICHR kan phai khmat kyrpang sha kane ka thaiñ ban tih bniah ïa kiei kiba la jia ha kane ka thaiñ na ki jingthoh kiba la don ha ki ktien tynrai ka thaiñ.