Shen yn ioh ophis Block thymmai ka Mawkynrew

0

Shillong, Naiwieng 17 : U Myntri ka tnad C&RD Bah Hamlet Dohling ryngkat u Myntri ka tnad Kam Rep Bah Banteidor Lyngdoh u la buh ïa u mawnongrim na ka bynta ban tei ïa ka ophis treikam jong ka Mawkynrew C&RD Block ha Block Headquarter, Mawkynrew C&RD Block.
Haba kren ha kane ka jingïalang, u Bah Hamlet u la ong ki ophis Block ki long kum ki jingkieng hapdeng ka sorkar bad ki paidbah kumta u la banjur ba ka long kaba donkam ban pynbha ïa ki jaka treikam bad ki rukom treikam khnang ban lah ban ai ka jingshakri kaba kham bha.
“Ka sorkar ka la mang haduh 120 klur tyngka na ka bynta ban kyntiew kyrdan ïa ki 40 tylli ki ophis block kiba don ha ka jylla, bad la mang 2.77 klur tyngka na ka bynta ban shna ïa kane ka ophis Block kaba ka kam kan sdang noh shen.
U Myntri u la ai ruh ka jingïaroh ïa ka rukom ïa ka rukom treikam ka ophis Block ha Mawkynrew kiba la trei shitom na ka bynta ban pyntreikam pura ïa bun ki skim jong ka sorkar jylla bad ruh jong ka sorkar pdeng. Shuh shuh u la kdwe ruh halor ka jinglah treikam bha ka tnad pynroi nongkyndong ha ka jingpyntreikam pura ïa ka skim 100 sngi lane ka MGNREGS bad khamtam eh ha ka jingnang kiew arted ka jingdon ki SHG ha ka jylla ha kine ki khyndiat snem.
Kiwei pat kiba kren ha kane ka sngi ki kynthup ïa u MLA ka thaiñ bad Myntri ka tnad ka Rep ka Riang Bah Banteidor Lyngdoh bad ruh u SC Sadhu, Director, C&RD Department nalor kiwei kiwei.

Leave A Reply

Your email address will not be published.