Shillong, Naiwieng 17 : U National General Secretary ka AITC, u Abishek Banerjee ha ka sngi Palei u la poi ha Tura ha ka jingwan ba ar sngi jong u sha kane ka jylla kum shi bynta ban pynkhreh na ka bynta ka elekshon MLA 2023.
Kane ka jingwan jong u Abishek ka long ban pynïar shuh shuh ïa ka jingshakri jong ka TMC ha rilum Garo ha kaba u la plie ruh ïa ka ophis treikam jong ka party ha Tura.
Katkum ka prokram, ha ka step sngi Thohdieng pat, utei u MP ka TMC un sa kynduh pat bad ki nongïalam Balang ha Sacred Heart Shrine kaba don ha Chandmari, Tura. Hadien kane pat un sa leit ban kren ha ka jingïalang paidbah ha New Tura Playground kaba don ha Tura Law College.
Ha ka jingwan ba nyngkong ha u Jylliew mynta u snem, utei u heh ka AITC u la sdang ïa ka jingpynrung dkhot paidbah ha ka Meghalaya TMC kum shi bynta ban pynjur shuh shuh ka jingpynkhreh na bynta ka elekshon MLA ha u 2023.
