Shillong, Naiwieng, 17: U Bah Renikton Lyngdoh Tongkhar, uba long u Myntri ka Sorkar Jylla bad u MLA jong ka HSPDP na Mawkyrwat Constituency ha ka sngi Palei u la ong ba ka jingthmu ban ïasoh noh shen bad ka United Democratic Party (UDP) ka long ba u angud ban ïoh ba kan don tang kawei ka seng riewlum kaba khlaiñ ha kane ka jylla Meghalaya.
“Ka jingthmu jong nga (ban ïasoh bad kawei pat ka party) ka long kaba shai ban pynkhlaiñ tang kawei ka seng riewlum ha ka jylla. Nga kwah ban ïohi ba ka Meghalaya kan don tang kawei ka seng riewlum kaba khlaiñ,” ong u Bah Renikton ha ka jingïakren bad ki lad pathai khubor.
Haba kyntait ïa ka jingkynnoh ba la shah khroh ha ki nongïalam ka UDP, u Bah Renikton uba dang long ruh u MLA ha ka sien banyngkong eh u la ong, “ban long u MLA, ngi dei ban long kiba la ïar jingmut kat haduh ban shim ïa ka rai na ka bynta ka jingmyntoi jong ki paidbah hapoh ka Constituency bad kumjuh ruh ha ka jylla khnang ban dup lah shakri kham bha. Kam da donkam eh ïa ngi ban shah khroh lane ban shah riam da mano mano.” Ka khubor ka la her bha sha Mawkyrwat lada u Bah Renikton un dang ïai neh bad ka HSPDP un dang jop ha ka elekshon 2023. U Bah Renikton u la kubur ba ka jingshim rai ban leit pynïasoh bad kawei pat ka seng saiñpyrthei ka la mih ka jingïakren kaba bun bha na ki paidbah ka Constituency. “Don ki briew kiba ong lada phi ïai neh bad ka HSPDP phin dang ïoh ïa kiwei pat ki ban dang wan ïasoh thymmai hynrei ngan ong ïa phi ba kata ka dei hynrei kaei kaba ngan leh ka dei kaba nga ladep ïasyllok shwa bad shim ïa ka rai na ki nongkyrshan,” u la bynrap.
Ka HSPDP ka la dep pynbna dang shen ïa ka kyrteng jong u Bah Medalson Lyngdoh Tongkhar kum u kyrtong Na Mawkyrwat ban aireng ha ka elekshon sha ka Ingdorbar Thawaiñ ka ban sa long ha u snem 2023.
Haba pdiang ïa kane ka rai, u Bah Renikton u la ong ba u sngewthuh ba ka HSPDP kaba la don la u jong u MLA lada kam sei da uwei pat u kyrtong kan paw biej pynban.
“Namarkata, kam leilei, ngam sngew eiei. Ngam don eiei pyrshah ïa ka HSPDP kaba la sei ïa u kyrtong (ban ïakhun pyrshah ïa nga. Ngin sa ïa peit, ngan ïakhun ïa ka elekshon bad nga ieh ruh ha ka jingstad jong ki paidbah ka Mawkyrwat ban rai ïano ban ai vote,” u la ong.
Haba kylli, lano un mih noh na ka HSPDP ban pynïasoh bad ka UDP, u Bah Renikton u la ong ba u dang ap ïa ka por kaba biang tam bad u la ong ruh ba long uba la pynkhreh ban leit sha ka elekshon bad bynrap, “lada ka elekshon ka long kham kloi leilei nga dang kmen bha.”
Ha kawei pat ka liang u Bah Renikton u la ong ba kam don kano kano ka jingïapher hapdeng ka HSPDP bad ka UDP namarba ki dei hi ki Regional Party.kine ki ar tylli ki party bad dei na kata ka daw ngam sngew don kano kano ka jingsngewpher lada ngan ïakhun na ka HSPDP lane na ka UDP,” u la ong.
