Shi khung ki kam pynroi leit sam u MLA ïa ki shnong khappud ka Meghalaya-Assam
![](https://mawphor.com/wp-content/uploads/2022/11/WhatsApp-Image-2022-11-17-at-6.22.50-PM.jpeg)
Nongpoh, Naiwieng 17: U MLA ka Nongpoh u Bah Mayral Born Syiem mynta ka sngi u la leit ban plie iaki kam pynroi haki shnong khappud ka Nongpoh Constituency kiba don syndah bad ka jylla Assam bad kumjuh ruh ban sam shi khung ki kam pynroi (work order) sha kitei ki shnong naka bynta ban kyntiew ïaka roi ka par ha Nongpoh Constituency lyngba ka Inter State Border Area Development Programme bad kumjuh ruh naka skhim SRWP.
Kum ban shu pynpaw ba katei ka Interstate Border Area Development Programme kaba dei ka skhim bala mang kyrpang sha ki paidbah ka thaiñ khappud kaba ki shnong ha katei ka thaiñ Nongpoh Constituency baroh shi katta kim pat ioh, hynrei naka jingshimkhia u MLA bun na kitei ki shnong kiba don kumba 23 tylli ki ba shah kynthup ha katei ka skhim kila sdang ban ioh ïaki kam pynroi bad myntoi.
Kitei ki skhim pynroi bala plie ha katei ka sngi ki kynthup ïaka lynti iaid kjat haka shnong Khongwing bala mang pisa lyngba ka Inter State Border Area Development Programme, ki skhim naka SRWP ki kynthup ïa ka iing Dorbar haka shnong Ampriling bala mang pisa haduh 2 lakh, ki work order shaka shnong Amjong ban shna ïaka ïing thaiñ jaiñ bala mang pisa T. 1.50 lak, 1 lakh ban pynbha ïaka madan haka shnong Khongwing bad 1 lakh ïaka shnong Ampriling ban shna ïaka sem ap kali.
Ha katei ka sngi naka liang u MDC u la sam ruh ïaka work order ban pynbha ïaka iing dorbar haka shnong Amjong bala mang pisa haduh 1 lakh naka MDC scheme.
La sakhi ruh ha katei ka sngi da ka jingdonlang u Bah Balajied Ranee MDC, ki nongïalam shnong bad kiwei kiwei ki riew rangbah naduh ki longkmie longkpa.
Haba kren ha katei ka sngi naka liang u Bah Mayral Born Syiem kum u MLA u la pynpaw ba ka jingkyrkhu ïaki shnong khappud ha Nongpoh Constituency hadien ba kumba 23 tylli ki shnong ha katei ka thaiñ kila shah kynthup haka skhim ba kyrpang bala tip kum ka Inter State Border Area Development Programme ha kaba kila don ki shnong kiba la ioh pdiang bad don ruh kiban sa ioh.
U la ong ruh ba kum u MLA u don ka jingkitkhlieh ban wanrah ïaka roi ka par ïaki shnong bapher bapher bad dei namarkata ka daw ba kum u MLA u la leit ban plie bad ban sam ruh ïaki kam pynroi ha katei ka sngi naka bynta ka jingmyntoi jong ki nongshong shnong ha katei ka thaiñ bad kyrmen ba ki paidbah kin pyn donkam hok bad pyntreikam hok ïa kitei ki skhim. Kum u nong mihkhmat u Bah Mayral Born u la kyrpad ruh ïaki paidbah nongshong shnong ha katei ka sngi ba kin ïatylli naka bynta ban wanrah shuh shuh ki kam pynroi.