Ka iewdielang ha Umdiengpoh ban kyntiew ia ka ïoh ka kot bad khring ia ki nongjngohkai pyrthei

Shillong, Naiwieng 16: U nongthawaiñ ka Sohra Constituency, Bah Gavin Miguel Mylliem ha ka 15 tarik u Naiwieng, 2022 u la plie paidbah ia ka Iewdielang lane ka Lay-By Market ha ka shnong Umdiengpoh kaba hap hapoh ka Khatarshnong-Laitkroh C&RD Block.
Ia kane ka iewdielang la shna lyngba ka mang tyngka jong ka Pradhan Mantri Khanij Kshetra Kalyan Yojana (PMKKKY) bad Chief Minister’s Special Development Fund (CMSDF) kaba long T. 69,56,200/-.
Haba kren ha ka jingialang plie ia kane ka iewdielang, u Bah Gavin u la ong ba ia ka thain Sohra la ju tip paidbah ba ka don ia ki jaka ba itynnad ba la saindur da ka mei Mariang bad bun ki nongshang jngohkai pyrthei ki wan tuid na kylleng kylleng.
U la ong ba ki nongshong shnong ka thaiñ ki shna ia ki dukan ba malu mala bad shna shipor ia ki harud ki surok ban die ia ki mar rep ne kiwei pat ki jait jingdie bad kumta u la sngew ba ka long donkam ban shna da ka kynja iew kaba paka ban kyntiew ia ka ioh ka kot jong ki.
“Bunsien ki nongwan jngohkai pyrthei ki hap ban shu ieng ha surok bad kam long kaba shngain bad da ka jingdon ka iew pat kin ioh ban rung ban kham pynlut por ban thied ia ki mar rep ne ki tiar ki tar kiba ki nongshong shnong ka thain ki die”, u la ong.
Da kaba pyntip ba la thaw ia ka Market Committee ban pyniaid ia kane ka iewdielang, u la ong ba ka long kaba donkam ruh ban sumar khuid ia ka da ka jingiatreilang.
“Ka Market Committee ryngkat ki dkhot na ka shnong bad ophis PWD kin iatreilang ban pynneh ia ka khuid ka suba ha kane ka iew”, la ong u Bah Gavin uba la bynrap ba hadien ka khlam COVID-19 ka la don ka jingpyrshang ban shna ia ki iew ha kylleng ki shnong.
U la ong ba kane ka jingplie ia ki iewdielang kan plie lad ia ki paidbah ban pyrshang ban kyntiew ia ka ioh ka kot jong ki lyngba ki kam die jingdie khamtam da kaba shim kaba ban khring ia ki nongwan jngohkai pyrthei.
Ia kane ka iew la shna ha ka rukom kaba itynnad bha bad kaba lah ban khring ia nongshang jngohkai pyrthei ha kaba ha phyllaw la shna ia ki kor shongthait da ki mawlyngknap bad ki maw sawdong ba la stah dur bha.
Nalor u Bah Gavin, la ia donlang ha kane ka sngi da u Bah P Tynsong, BDO ka Khatarshnong-Laitkroh Block, u Bah Edmund Syiemiong, Executive Engineer PWD (Roads) Sohra Division, ki nongialam shnong ka shnong Umdiengpoh nalor ki nongioh dukan ha katei ka iew bad kiwei pat.