Ki khynnah ki la trei shitom, kamram dei sa ka sorkar ban nang kyntiew shaphrang: Finely Pariat
99% kiba khur takma ïa ka Jylla ha ka NEOG kidei na nongkyndong
Shillong, Naiwieng 16 : U Bah Finely Pariat General Secratary ka Meghalaya State Olympic Association (MSOA) u la ong ba ki khynnah ïalehkai jong ka Jylla ki la trei shitom bha ha ka 2nd North East Olympic Games 2022 kaba la pynhap pyrda noh hynne ka sngi Balang ha SAI Training Centre, NEHU, Shillong, ka shong pat sa ha ka sorkar ba kan nang kyntiew shaphrang ïa ki ha ki jingïalehkai.
“Kadei ka jingtrei shitom jong ki khynnah, namar ngim don kino kino ki jaka kilan met kiba biang bad mynta ka shong sa ha ka sorkar ba kan nang kyntiew ïa kine ki khynnah ban pynlut pisa ban pynbit pynbiang na bynta jong ki ba kin nang kiew shaphrang ha ki kam ïalehkai, ym ban shu iehnoh ïa ki kumto hynrei dei ban sara bha haduh ba kin da ih bha ha ki kam ïalehkai,” ong u Bah Finely Pariat haba ïakren bad u Mawphor.
U Bah Finely u la pynpaw ruh ka jingsngewkmen ba ki nongïalehkai Athletics jong ka Jylla mynta ki la kiew stet ha ka jingïalehkai. “Tang ha ki 20 sngi ba ngi pynkhreh ngi la ïoh shisha ban kheit ïa u soh ba thiang na kane ka lympung, ngi la pynlong ka jingpyrshang (trial) hapoh ka jingïalam ka Kong Deicy Marweiñ hynrei kane baroh kadei ka jingtrei shitom jong ki khynnah,” u la ong.
Shuh shuh u Bah Finley Pariat u la ïathuh ruh ba mynta ka kynti ka Athletics ka la kiew ym tang ha ka jingïalehkai hynrei wat ha ka jingïoh khur takma. “Ngim lah ban mutduh ba ha ka jingïalehkai kaba khatduh ngi la ïoh tang kawei ka takma Ksiar hynrei mynta ngi la ïoh haduh 15 tylli ki takma Ksiar bad ha baroh ngi ïoh 40 tylli ki takma. Ym tang ha ka jingïoh takma hynrei ka jingïalehkai ki khynnah jong ngi ka long kaba itynnad bad kane ka pyni shai ba ngi don ki khynnah don sap, hynrei ka shong pat ha ka sorkar ba kan nang kyntiew ïa ki shaphrang.”
“Ng kyrmen skhem ba ka sorkar kan nang ai ka jingkyrshan ym tang ha ka Atheltics hynrei ha kiwei ki jait jingïalehkai namar ngi don shisha ki khynnah kiba donsap bad kyrmen skhem ruh ba ngin sa ïohi ba kin long ki lahduh ha ka National bad wat haduh International ruh kumjuh,” ong u Bah Finely Pariat.
U Bah Finely Pariat u la ïathuh ba haduh 99% kiba khur takma ïa ka Meghalaya ha kane ka 2nd North East Olympic Games 2022 kidei na ki shnong Nongkyndong bad ruh kiba dei ha ki kyrdan jong ki Junior.