Williamnagar, Naiwieng 11 : Dei tad hadien ba ka ïing bishar High Court ka la pynmih da ka hukum ba ki bor pynïaid ka MTC kim nud shuh ban shu lehkamkai bad hap ban siew ïa ka pisa jingïarap ba la kular ban siew sha ki lanot ba iap bad mynsaw kylla ka MTC mar hynniew lak tyngka.
Ha ka jingpyllait khubor la ïathuh ha u bnai Risaw 2021 la ujor mukotduma ha ka Mator Accident Claim Tribunal (MACT) ban ïarap pisa ïaki lanot kiba la iap ha ka jingkylla ka bus MTC khnang ba ki khun ki kti jongki kin ïoh jingkyrshan. Kane ka jingkylla ka bus ka la jia ha ka 30 tarik Nailur 2021.
Haba la ïoh pdiang ia ka shithi halor kane ka mukotduna, ki bor pynïaid ka MTC lyngba ki nongïasaid aiñ jongki ki la kyrpad ïa kiba la ujor mukotduma ban weng noh ïakamukotduma bad ïakren ïa suk bad ïa pynbeit noh shabar ka ïing bishar. Kumta haba la ïa pynbeit la kular ban siew mar 7 lak tyngka sha kiba haïing hasem jong kitei ki shem lanot.
Kine kiba haïing lyngba u nongïasaid aiñ jongki ruh ki la pdiang ïa kane ka jingtyrwa ka MTC bad ka ïing bishar ruh ka la pynwai noh ïa ka mukotduma. Ha katei ka juh ka sngi la ai mar 1 lak sha ki long ïing jong kiba la khlad bad mar 50 hajar sha ki long ïing kiba mynsaw jur.
Hynrei hadien shibnai ka MTC ka khlem siew pat ïa katei kaba la kular kumta kiba haïing kim banse ba leit ujor sha ka ïing bishar High Court. Ka ïing bishar High Court ka la pynmih ka hukum ba ka MTC ka dei ban siew dep ïak a pisa hapoh lai bnai naduh ba la pynmih ïa ka hukum.
Dei ha ka 7 tarik Naiwieng 2022 la ai ïa ka cheque ba mar 7 lak tyngka sha kiba haïing, Kine ki long u Pukan N Marak uba dang im haduhm ynta uba dei na Nengkhra bad kiba la khlad ki long u Sengsrang R Marak na Damra, Tangsimbirth M Sangma PWD Old Colony, Trawin R Marak na Bolkinggre, DImsi M Sangma na Rangmalbadim bad Chekamchi M Sangma na Balsrigittim.
