Shillong, Naiwieng 02: U Bah Earnest Mawrie President jong ka BJP Meghalaya ha ka sngi Ba-ar u la ong ba ka rai khatduh ban shim halor ka jingweng noh ka BJP na ka sorkar MDA ka dei tang ynda ki la ïoh ktien na ki nongïalam ba halor na Delhi.
“Ngi dang ap ïa ka rai jong ki nongïalam na Delhi haba ïadei bad kane bad ngim lah ban shu weng hi beit khlem da ïoh ktien shuwa na ki”, u la ïathuh ha ka jingïakren bad ki lad pathai khubor.
U Dr Chuba Ao u nongpeit pyrman jong ka BJP Meghalaya dang ha kine ki khyndiat bnai ba la dep u la ong ba ka BJP kan sa weng noh ïa ka jingkyrshan na ka MDA tang hapoh shibnai hynrei kaba ym shym la pat la ïohi ksai eiei haduh mynta.
Na ka liang u Bah Earnest u la ong “Halor kane ka mat ngam lah ban ong eiei u namar kaei kaba u nongpeit pyrman ïa ka BJP ha ka jylla u kren ha kato ka por um pat ïakren eiei bad nga”. “Kumba long mynta ki arngut ki MLA ka BJP u Bah Sanbor Shullai bad u Bah AL Hek ki dang ai jingkyrshan ïa ka sorkar MDA ba ïalam da ka NPP.
Haba kylli halor ki jingkynnoh bamsap ka BJP ïa ka sorkar MDA u Bah Earnest u la ïathuh ba na ka liang ka BJP ka la dep ban aiti ki kot ki sla bad ki sakhi satar sha Delhi halor ka jingbamsap ha ki District Council, ka jingshalan dewïong be-ain.
“Kat kaba ngi kynnoh bamsap ngi la dep ai ki sakhi satar bad ki jingpynshisha ban pynskhem ïa kaei ba ngi kynnoh sha ki nongïalam ha Delhi. Ngi la ïathuh ruh kaei ka jingeh ba ngi kum ki nongshong shnong ka jylla ngi ïa kynduh bad ngi ap sa tang ka rai na ki halor kane(ka jingweng jingkyrshan na ka MDA)” u la ïathuh.
Shuh shuh u la ong ka bamsap bampong bad ka jingthut ka shongsuk shongsaiñ ha ka jylla ka ju jia man ka por ha kane ka sorkar ba mynta.““
“Ngi sngewthuh ba ngi don hangne ruh na bynta ki paidbah baroh bad kaei kaba ngi kwah ka dei ka roi ka par bad ka shongsuk shongsaiñ bad kane hi kadei ka phang pdeng jong ngi” u la bynrap.
