Sbun markylliang, map markylliang, sngewlem markylliang katba dang im ha sla pyrthei: Abp Victor Lyngdoh

Shillong, Naiwieng 02: Kumba ju long man la u snem ka Balang Catholic ba man ka 2 tarik u Naiwieng ka ju kynmaw kyrpang na bynta ki mynsiem ba la khlad noh bad ka ju pynlong ka jingduwai na ka bynta jong ki ba kin ïoh ka jingjahthait bad ba kin poi suk sha ka hima u Blei.
Mynta ka sngi ruh ka Balang Catholic ha Shillong Archdiocese ka rakhe kyrpang ïa kane ka sngi kiba la khlad noh da kaba pynlong ïa ka jingkñia ïa ka Mass Makhuid ha u lum jyntep jong ka Balang ha kylleng ki jaka bad na ka liang u Mawphor u la ïoh ban shim bynta ïa kane ka sngi kyrpang ki mynsiem ba la khlad noh ha lum jyntep ka Balang Catholic ha Laitumkhrah.
Ha kane ka sngi u Archbishop jong ka jylla niambah Shillong u Archbishop Victor Lyngdoh u la pynbynta ïa ka mass bakhuid ban duwai na bynta ki mynsiem ba la khlad noh baroh.
Ha ka jingpharia ïa ka Ktien u Blei u Archbishop u la khot la wer ïa baroh ki paidriewngeit kiba dang don ha sla pyrthei ban duwai na bynta kiba la khlad baroh kumba la kyntu ha ka ktien jong u Blei.
U la kyntu ruh ïa ki paidriew ngeit ba kin long kiba sbun, kiba ïarap markhylliang, kiba sbun mar kylliang bad kiba ïamap markhylliang para briew katab dang im ha sla pyrthei ban ïoh ïa ka jingsuk bneng ynda la kut ka jingïaid pilgrims ha sla pyrthei ym ban kynmaw ieid ne burom tang ynda ki la khlad noh.
U la ong ruh ba ki riewngeit Catholic baroh ki ju khuslai haba ki baieid bathoiñ ki khlad noh hynrei wat la katta ki don pat ka jingkyrmen ba kin ïoh ïa ka jingjahthait bym ju kut ha ka hima bneng bad ba kin mih pat biang ha ka sngi khatduh.
Shuh shuh u la ong ba ka Balang Catholic ka don ka jingburom kyrpang ïa ki mynsiem kiba la khlad noh kumba ka jinghikai tynrai jong ka niam kur mynba ka dang ieng hapdeng ka jaidbynriew.
Ha kane ka sngi la sakhi ba ki ba ki paid riewngeit kiba don kiba haïing hasem jong ki kiba la tep ha kane ka jaka ba ki la wan shim bynta riewblei ha ka jingkñia ïa ka Mass Bakhuid bad ban wan buh syntiew bad thang mombati ha ka jaka tep ki baieid bathoiñ jong ki bad ban pynlong jingduwai ruh na bynta jong ki.