Mih ki jingpynkulmar ha ka jingïaid paidbah ka FKJGP halor ka jingbym ïoh kam ïoh jam

Shillong, Risaw 28: Ka jingïaid paidbah kaba la khot pynlong da ka Federation of Khasi Jaintia and Garo People (FKJGP) ha ka sngi Thohdieng naduh na Motphran haduh madan Iew Rynghep (Fire Brigade) ban dawa ba ka sorkar kan wanrah da ka aiñ State Employment Policy bad ban pynbeit ïa ka thungkam thungjam ha ka rukom kaba shai, kila mih pynban ki jingpynkulmar lynter lynti kat haduh ba bun kiba shah sympat bad bun ruh ki dukan kiba la hap ban khang khyrdep noh shiteng sngi.
Ha kane ka jingïaid paidbah la sakhi ba ki nongïalam jong kiwei pat ki seng balang ba kynthup naduh ka KSU, RBYF, JSU, HNYF ki la wan shim bynta lang.
Haba kren ha kane ka sngi u Bah Sadon Blah u la ther tyngeh ïa ka sorkar namar ka jingshah shiliang ka rukom thungkam ïa ki samla wad kam namar ka don ka jingnoh shiliang tang sha kiba don ba ithuh ithaw.
U la ong ruh ba ka jylla kaba kiba bun na ki nomngshong shnong ki dei ki nongrep hynrei wat la katta kam don wat tang ka Agricultural Policy.
Shuh shuh u la ong ba wat ka kam jngohkai pyrthei kaba kiwei ha ka jylla hynrei ka dei tang na bynta ka jingmyntoi kiba nabar jylla namar ym don kano kano ka Policy na bynta ka jingmyntoi ki trai muluk trai jaka.
“Peit ki nongjngohkai pyrthei ki wan da ki kali ba na West Bengal aiu ki ai jingmyntoi ïa ka jylla palat ïa ka kam die waidong,” u la ong.
Shuh shuh u la ong ruh ba ka jingdon ki karkhana kam wanrah jingmyntoi eiei na bynta jong ka jaidbynriew namar ka jingbymdon ki Policy kiba biang na bynta ka kam ka jam.
U la kyntu ruh ïa ki paidbah ka jylla ba kim dei ban ngop ha ka bor jong ka pisa ban jied ïa ki nongthaw aiñ namar kane ka wanrah ïa ka jingkulmar lut ka synshar khadar.
U Samla Lambokstarwell Marngar President ka KSU u la ong ba ka jingduhkam ki samla ka wanrahy ïa ka jingduh mynsiem bad ka jingsngew kutlad ha ki samla kiba la nang la stad.
U la kynnoh ruh ba ka don jingthungkam thungjam sopsop ha ki eksamin ba pynlong da ka MPSC bad DSC.
“Ki kmie ki kpa ki trei shitom ban phah skul da ka ram ka shah na bynta ki khun jong ki da ka jingkhmih lynti ba kin ïohkam ynda ki ladep ka jingpule, hynrei ynda la dep pule ki hap shimram biang sa ban thied sa ïa ka kam da ki bun bun lak,” u la ong.
Shuh shuh u la ong ba ka jingduhkam duhjam ka dei namar ka jingbymdon nongïalam ban pruid dak ïa ki Policy na bynta ki samla.
“Ka daw ba ka long haduh katne ka dei namar ngim don nongïalam ha Secretariat hynrei ngi don da ki Boss bad lada ngi ailad ïa kine ki Boss ban dang synshar kan nang pynsniewdur shuh shuh ïa ka jylla,” u la ong.
Shuh shuh u la maham ba lada kane kam kylla kan sa poi ba ki samla ha ka jingsngew kutlad ki lah ban shim wat da ka sienjam ban ïa umsnam ruh.
“Lada kine kiba bat ïa u lakam ka synshar khadar ki long kyllut sah kumne kan sa poi ka por ba ba ha jaka u khulom kin sa shim da ka tiar, ha jaka ka sia kan sa phlei da ka snam,” u la bynrap.
Haba kren ha kane ka sngi u President ka FKJGP u Bah Dundee C Khongsit u la ong ba na ka liang ka FKJGP lada ka sorkar kam pynkylla dur ïa kane ka jinglong jingman kaba pyntyrha ïa ka jingmut jingpyrkhat ki samla kan sa poi ka por ba ka snam kan lyngkien ha madan.
U la ong ba ka jingthungkam beit tang ïa kiba ithuh ithaw bad kiba don jingïadei bad ki lei san snem.
Haba ïadei bad ka jinglap u Bah Disparsing Rani lyngba ka jingwad jingtip da ka RTI ba ka don jan haduh 8,000 tylli ki kam ba lait kiba ka sorkar kam pyndap shuh la bun bun snem, u la ong ba ka long markhongpong ïa kaei kaba u Myntri Rangbah ka jylla u la kam ba ki don tang kumba 3,000 tylli ki kam bad ong ba kane ka pynphalang ïa ka jingbym don jingkit khlieh satia jong u bad ka sorkar hi baroh ïa ka lawei ki khun samla.
U la ong ruh ba ka jingsuki ban thungkam ha kine ki post ba thylli ka sorkar ka dei ban shim jingkitkhlieh ym ban thed kti bad kynnoh sha ki ophisar bad ki tnat jong ka.
“Lada ka sorkar ka lap ba ki ophisar jong ka kim pyndep hok ïa ka kamram jong ki ka dei ban ai jingpynshitom kaba tyngeh,” u la ong.
Shuh shuh u la ong ba ka sorkar ka dei ban shna ki Policy ban tehlakam ïa ki kompeni ba lada ki wan ban seng kano kano ka kam ne buh ophis ki dei ban pynrung kam nyngkong eh ïa ki trai muluk trai jaka.
Ha kane ka sngi na ka liang ki nongai jingkren ki la pynpaw ïa ka jingpynrem jur ïa ka sorkar halor ka thungkam thungjam bad ka jingnoh mon tang sha kiba ithuh ithaw wat ha ki kam kontrak ruh ha kaba tang kiba don jingïadei bad ki heh ki haiñ ki ïoh ban pyntrei ïa ki projek ka sorkar.