Ka kam ri dohkha kam dei tang ka jingbyrngia hynrei ka dei ruh ka lad kamai: SC Sadhu

Nongpoh, Risaw 28: Ka tnad Fisheries ha Ri-Bhoi District mynta ka sngi kala pynkut noh ïaka jingrakhe ïaka District Aqua Fest 2022 hadien ba ki nongri dohkha na kylleng ka dong Ri-Bhoi kila wan ban shim bynta ban pyninam haka iew dohkha bad kumjuh ruh ki jingpynmih bapher bapher naki kynhun nongrep, ki SHGs bad kiwei kiwei bala pynlong ha ophis ka tnad Fisheries ha Nongpoh.
Ha katei ka jingrakhe ïaka Aqua Fest la ioh ruh ban plie paidbah ïaka ophis ba thymmai jong ka tnad Fisheries ha Nongpoh ha kaba u SC Sadhu Secretary ka tnad Fisheries ka jylla u la wan ban shim bynta kum u kongsan, haka jingdonlang ka kong M. A Khongjliw ka ophisar ba dei peit ïa ka Ri Bhoi District, ka Principal ka MSFR&TI ka kong O. Khongngain lem bad ki nongtrei jong katei ka tnad ha ryngkat ki khynnah skul ki nong ri dohkha na Ri Bhoi ki ba la wan ban sakhi lang ha katei ka sngi.
Ha katei ka sngi na ka liang jong ka tnad Fishery kala aiti ruh ïaki work order sha 5 ngut ki nongri dohkha na Ri Bhoi kiba la ithuh naka Meghalaya State Aqua Culture 2.0 bad ha katei ka juh ka sngi la ioh ruh ban aiti iaki 2 tylli ki thuk thuk sha ki ar ngut ki nong ri dohkha na bynta ba kin ioh ban kit ïaki dohkha ban leit die sha ki iing briew kiba don ruh ki synduk thah kiba khuid ba suba, kaba dei lyngba ka skhim Pradhan Mantri Matsya Sampada Yojana Scheme 2020-21.
Haba kren ha katei ka sngi naka liang u SC Sindhu Secretary ka tnad Fisheries Department ka jylla u la ong ba ka kam ri dohkha ha kine ki sngi kam dei shuh tang ka kam byrngia lane ka tamasa hynrei ka dei ka lad kamai bad ka lad iohkam iohjam, khamtam ki nongri dohkha ha Ri-Bhoi kiba don mar syndah bad ka jylla Assam bad ka long kaba kongsan ba ki nongri dohkha haka jylla kin ioh ka jingtip bad ka jinghikai ba pura katkum ka jingïaid ka por khnang ba yn lah ban dang kyntiew shuh shuh ïaka kam ri dohkha kawei naki lad ba ai jingmyntoi ïaki paidbah bad kyntiew ruh ïaka ioh ka kot bad ka iohkam iohjam.
U la ong ruh ba ka jingrakhe ïaka Aqua Fest ka long ruh kum ka jingithuh halor ka jingtrei shitom jong ki ban kyntiew ïaka kam ri dohkha haka jylla kaba dei kawei naki thong jong ka sorkar jylla ym tang haki jaka sor hynrei sha ki shnong kyndong, kumba ka kam ri dohkha ka don ka bynta kaba khraw ym tang haka jingpynmih pisa, hynrei kadei kawei naki lad iohjam iohjam khamtam ïaki khun samla ha kane ka juk ba mynta ba kin ïeng hala ki jong ki kjat bad lyngba ka State Aqua Culture Mission.
Naka liang u tei u ophisar sorkar u la ai ruh ka jingïaroh ïaki nongri dohkha na Ri-Bhoi ban pynlong ïaka thong jong ka sorkar kaba jop bad seisoh, ha kaba u la kyrpad ruh ïaka tnad ri dohkha ba kin don ka jingïatreilang kaba jan bad ki nongri dohkha ban dang kyntiew shuh shuh ïaka kam ri dohkha haka jylla baroh kawei, ba ka jylla kan lah ban pynmih hi ïaka dohkha ban bam.
Ha katei ka sngi la ioh ruh ban sam ïaki khusnam sha ki nongjop haka jingïakop dro dur bala shim bynta da ki khynnah skul bapher bapher ka thaiñ Nongpoh halor ka phang Fish For Life.