Yn sdang ka Ri Bhoi ban lum thup ïa ki nongpang da ki kor Computer lyngba ka Pilot Project : CM

Nongpoh, Risaw 28: U Myntri Rangbah ka jylla u Conrad K Sangma u la ong ba ka sorkar shen kan sa pyntreikam ïaka kawei ka project (Pilot Project) ka ban sdang na Ri-Bhoi District kum ka nonglam khmat haka jylla ban lum thup ïaki kyrteng jong ki nongpang (Patients Medical Record) lyngba ki kor komputer bad ki software bala shna kyrpang da ka sorkar ban pynsuk ïaki Doctor naduh ki CHC haduh ki Civil Hospital haka district.
Katei kadei ka thong jong ka sorkar ban pynduna ka jingkhia haka jingtreikam ïaki Doctor haki jaka sumar namar kumba long mynta ki Doctor ki hap ban lut bun ka por ban thoh bad ban pyndap ïa ki kyrteng jong ki nongpang, hynrei lyngba katei ka project kan pynsted bad pynaram ïaka jingtreikam haki jaka sumar.
U la ong ruh ba katei ka Project kan dei kaba nyngkong eh haka jylla ban sa pyntreikam haki taiew ban wan ha Ri-Bhoi District, ba ki dotor kim donkam shuh ban pynlut por da ki kynta ban pyndap haki kot, hynrei katkum ka juk stad mynta yn lah ban ai ka jingtip sha ki nongpang bad ban lum lyngba ki kor komputer ban pynkylla ïaka rukom treikam haka tnad ka koit ka khiah.
Lyngba katei ka software yn lah ruh ban ïathuh lypa ba lada ka don ka jingpang pynhiar haki bnai lyiur yn lah ban buh bad pynkhreh lypa ïaki dawai dashin.