Pan jingtip u Myntri na ka DHS halor ka rukom thungkam ha hospital Mawkyrwat

Shillong, Risaw 26 : U Myntri ka tnad ka Koit ka Khiah ka Jylla, James K Sangma u la ïathuh ba um tip ei ei halor ka jingthung kam ha ka hospital ba 100 jingthiah ha Mawkyrwat bad dei na kane ka daw mardor u la pan jingtip na ka Director ka tnad ka Koit ka Khiah ka jylla hadien ba ki la mih bun ki jingkynthoh halor katei ka bynta.
“Nga la dep pan jingtip na ka DHS halor kane bad la pyntip ïanga ba na ka bynta ban pyntyllun ïa ka kam khamtam ha kito ki kam kiba donkam kyrkieh ka DHS ka la thung kam ha kito ki kam kiba lait,” ong u Myntri haba kren bad ki lad pathai khubor.
Katei ka jingpan jingtip jong u Myntri na ka DHS kadei hadien ba ka la mih ka jingkynthoh kaba jur bha ha ki rynsan social media haba ïadei bad katei ka jingthungkam ha katei ka hospital ba 100 jingthiah.
Shuh shuh u ong ruh ba la pyntip ba dei halor kitei ki kyndon ba ïa kitei ki kam kiba donkam noh ban pyndap la thung noh mardor. “Ka jaka sumar kadei kaba donkam bad dei halor kane ka DHS ka la thung briew mardor katkum ka jingdonkam kyrkieh ka kam katba ym pat lah ban pyndap ïa ki kam kiba lait.”
U Myntri katei ka tnad u ïathuh ruh ba ka jingthung kam pura ha kitei ki kam kiba lait ha katei ka hospital ba 100 jingthiah, katkum ka lynti kaba dei hap ban leh lyngba ka District Selection Committee (DSC). “Hynrei na ka bynta shipor la hap ban shu thungkam shipor khnang ba la kumno kumno ka jingtreikam kan ïaid shakhmat. Katei ka jingthung kam ba mynta kadei beit na ka bynta shipor (contractual) khnang ba ngin lah ban bteng ïa ka kam katba ka DSC kam pat lah ban pyndap ïa kitei ki kam kiba lait.
Katkum ka jingong jong u, ka jingthungkam lyngba ka DSC namar ka kham shimpor dei na kata ka daw la hap ban shu thung kam shwa shipor katba ym pat lah ban pyndep ïa ka jingthungkam pura khnang ban pynïaid ïa ka kam.
Kumjuh haba ïadei bad ki nos, u Myntri u la ong ka jingthung kam pura kan dei hadien ba la pynbna ïa ka result jong ki nos ANM bad GNM ha kaba ïa kitei ruh yn sa thung ha katei ha hospital ba 100 jingthiah ha Mawkyrwat.