Shillong, Risaw, 20: U Symbud Myntri Rangbah ka Jylla u Bah Prestone Tynsong ha ka sngi Palei u la kular ba un sa rah ïa hakhamt ka jingïalang kynhun myntri ka Sorkar Jylla ka ban sa long shen ïa ka jingdawa jong ki nonghikai skul kontrak kiba don hapoh ka lama jong ka Meghalaya Government Lower Primary School Contractual Teacher’s Association (MGLPSCTA) ba ka tnat Pule Puthi ka Sorkar Jylla ban thungkam biang ïa ki hadien ba la weng ïa ki na ka kam ha u Kyllalyngkot, 2021.
Kane ka jingkular jong u Symbud Myntri Rangbah ka long hadien ka jingïakynduh bad u President jong ka MGLPSCTA u Babu Birbor Riangtem.
Ha ka jingïakren bad ki lad pathai khubor u Babu Birbor Riangtem u la ong ba kane ka jingleit pynsngew sha ki tyndong shkor jong ka Sorkar Jylla ka long namarba ki nonghikai skul kontrak kiba la shah weng na ka kam ki don mynta hapdeng ka jinglynga mynsiem bad ki ïakynduh mawsiang ban pyndap ïa ka iing ka sem namarba ki la shu shong khlem kam khlem jam mynta la jan shi ar snem duna.
“Ka jingshah weng kam jong ki nonghikai kam shym la ktah tang ïa ki shimet hynrei ka la ktah lang ïa ka iing ka sem jong ki bad kumjuh ruh ka la pynshitom ïa ka jingmut jingpyrkhat jong ki namarba ki pyrkhat khuslai naei kin ïoh pisa ban pyndap ïa la ka ing ka sem,” u la ong.
