Hiar hi u Bah Prestone sha Laitkyrkhong pra ka ktem HSPDP bad PDF
Yn hiar u CM ha ka 26tarik ban pynbna kyrtong
Shillong, Risaw 12 : Ka ktem HSPDP, PDF bad ruh jong ka Congress kiba hap ha Mawkynrew consti-tuency ki la pra phum hadien ba bun na ki nongïalam ba hakhmat jong kitei ki party ki la leit ban pynïasoh noh sha ka party NPP ha ka jingïalang kaba long ha kane ka sngi Balang ha Laitkyrhong.
Ïa kitei ki nongïalam ba hakhmat ryngkat ki nongkyrshan la leit ban pdiang burom hi da u National Vice President ka NPP Bah Prestone Tynsong ryngkat ka jingdonlang u President ka NPP East Khasi Hills Bah Jied Kurbah bad ruh u General Secretary, Bah Aibor Tynsong nalor ki nongïalam jong ka Women’s Wingh bad NPYF.
Haba kren ha katei ka jingïalang, u Bah Prestone u la ïathuh ba dang nyngkong eh na ka NPP ki la khroh nyngkong eh ïa u Bah Martle N Mukhim ban wan ïakhun na ka party ha kane ka elekshon ban wan hynrei um shym la treh satia.
“Lada phi peit bha ha ka politik Meghalaya shwa ban shongthait ki kwah ban jop bad shongthait noh artad,” u la ong da kaba ai nuksa naduh u Bah EK Mawlong, Prof RC Laloo, SC Marak, JD Pohrmen, Bah Rowell Lyngdoh kiba jop biang.
“Wat hadien ba leit ki nongïalam ka party ruh im treh bad kumta ha kaba khatduh nga khroh ïa kine ki riewrangbah namar nga sahnud shisha ïa kane ka constituency namar ka por ka la poi ba ngin synshar hi na ka thain na ka dong lajong nai shim briew shuh na shabar la thait,” bynrap biang u Bah Prestone.
Nalorkata, u ong ruh ba dei halor katei ka nongrim ba ki nongïalam jong ka HSPDP bad kiwei ki wan ban pynïasoh noh sha ka NPP namar ki kwah ïohi noh ïa ka jingkylla ha u 2023.
Ha kajuh ka por u la pynbna ha katei ka jingïalang ba u Myntri Rangbah dalade hi un hiar sha Jongksha ha ka 26tarik ban pynbna paidbah syndon ïa u kyrtong jong ka party, uba ki la jied da u Bah Kansing Lyngshiang.
Lah ban kdew hangne ba ki party kiba la dep ban pynbna kyrtong ha Mawkynrew ki kynthup ïa ka PDF kaba u MLA bad Myntri jong ka sorkar jylla Bah Banteidor Lyngdoh, nangta u Bah Remington Pyngrope uban ïakhun na UDP, Bah Martle N Mukhim na ka HSPDP bad mynta sa u Bah Kansing na ka NPP.