Shillong, Risaw 12 : U Myntri kam pohïing ka jylla u ma Lahkmen Rymbui um pat treh ban ong ei ei halor ka jingïakren ïasuk hapdeng ka sorkar pdeng, sorkar jylla bad ka seng HNLC.
U ma Lahkmen u la ong sha ki lad pathai khubor ba um pat treh ban ong ei ei ruh katba ym pat dep ka jingïakren ne kan bym pat shim kano kano ruh ka rai.
U la ong ïa kane halor ka jingkylli hato hadien ka jingleit phai ki nongïalam ka seng HNLC sha Bangladesh ki la phah ïa ki mat ban bteng ïa ka jingkren ïasuk.
“ Ngam dei ma nga ban kren ei ei halor kane ka jingïakren namar ki la don ki ksiang ba la thung ban pynïaid shakhmat ïa ka jingïakren bad ki nongialam ka seng HNLC. Kumta kam long kaba bha ban ïa mushlia hynrei ban ai lad ba ka jingïakren kan ïaid beit ïaid ryntih ha ka jingïapynbeit lang jongki.
U la ong “ Tang kawei kaba nga kwah ban ong ka long ba ngi kyrmen skhem ba ka jingïakren kan ïaid beit bad seisoh.”.
Ha ka 5 tarik Nailar ki san ngut ki nongïalam ka seng HNLC ki la wan sha ka jylla ban ïakynduh ïa ki ksiang ka sorkar pdeng bad sorkar jylla bad kine ki la wan hadien ba ka sorkar ka la mynjur ban ai jingïada ïaki haba ki wan sha ka miej jingïakren bad hadien kane ki la leit phai biang sha Bangladesh ban ïa kynduh bad pyntip ha ki nongïalam kaei ka jingmih na ka jingïakren jongki.
U la ong ba ka jingïakren ka la sdang bad ka jingleit jong ki sha Bangladesh ka long ban ïa kynduh para nongïalam ban pyntip ha ki kaei ka jingmih na ka jingïakynduh ha ka sien ba nyngkong bad kiei ki mat ba kin shim bad rah biang ha ka miej jingïakren.
