Nongstoiñ, Risaw, 12: Kum ka jingrakhe ba kyrpang ia ka jingdap 75 snem jong ka jinglaitluid jong ka ri India kaba la tip kum Azadi Ka Amrit Mahotsav, ka ophis jong u District Sport Officer West Khasi Hills kan pynlong ïa ka jingïamarehthong kaba 8.7 kilomitar ha ka 17 tarik mynta u bnai.
Ha u kyrwoh ba la phah mynta ka sngi da ka kong Balarina Syiem DSO, la ong ba ha ka katei ka jingïamareh thong yn pdiang ïa baroh shynrang bad kynthei kat kiba kwah ban wan ïashim bynta. Hynrei ki hap ban pynpoi ïa ki kyrteng jong ki ha ka ophis jong ka ha lane shuwa ka 14 tarik mynta u bnai ha ka por long trei bad kiba wan ai kyrteng, ki dei ban wanrah lang ïa ki original birth certificate na ka bynta ban pynshisha.
Na ka bynta kiba wan ai kyrteng hadien katei ka tarik ba la buh yn ym pdiang shuh bad kiba lah ban ïashimbynta kin dei beit tang na West Khasi Hills. Ïa katei ka jingïamareh, yn sdang na phyllaw jong ka ophis u Deputy Commissioner ha ka por 6.45 baje mynstep bad baroh ki ba nongïashimbynta kin pynpoi ha ophis jong ka DSO ha ka por 6.00 baje mynstep. Ki buskit na ka bynta ki nong jop ki don lai tylli ba kynthup ïa ki shynrang bad kynthei, kata ba nyngkong Rs 5000 tyngka ba ar Rs 3000 tyngka bad ba lai Rs 2000 tyngka.
