Shillong, Risaw, 11:Ka United Democratic Party (UDP) ka la ai jingmut ïa u Chief Adviser jong ka party u Bah Bindo M Lanong ban ïakhun na East Shillong Constituency ha ka Elekshon sha ka Iingdorbar Thawaiñ ka ban sa long ha u snem 2023.
“Ngi ai jingmut ïa u (Bah Bindo) ba un dang ïakhun beit na East Shillong namarba u don ka lad ban jop na kane ka Constituency. Hynrei ka rai ka shong ha u,” ong uwei na ki nongïalam ka UDP bym kwah pynpaw kyrteng ha ka sngi Baar.
U la ongba ka party ka kloi ban ai tiket ïa u Bah Bindo lada un ïakhun na East Shillong ba la mihkhmat ïa mynta da ka Dr. M. Ampareen Lyngdoh ka MLA jong ka Seng Congress ba la shah sospon.
U nongïalam ka UDP u laong ba u Chief Adviser u ïai ban ba u angnud ban ïakhun na Nongkrem ka bym dei hi ruh ka Constituency jong u.
“Ngim tip mano ba ai jingmut ïa ka kyrteng jong u haba ngi don da ka shnat treikam ha Nongkrem. Katkum ka jingtip jong nga um shym la ïaid lyngba ka Circle (kaba long katkum ki kyndon treikam ban mynjur bad ban phah sha ka district,” u la ong.
Lah ban kdew hangne ba ka Nongkrem Circle jong ka UDP ka ladep mynjur ïa ka kyrteng jong u MLA ba mynta u Bah Lambor Malngiang ban ai tiket ha ka elekshon 2023.
U nongïalam ka UDP u la ong shuh shuh ba ym tangba u Bah Lanong u dei dkhot ba la rim jong ka party hynrei kam mut pat u lah ban leh katba u mon.
“Ki don katto katne ki dkhot ki bym sngewthuh ïa ka nongrim jong ka party bad kiba kyrpad ban ai tiket ïa u hynrei ngi la pynsngewthuh ïa ki, ma ki ruh ki la mynjur ba u Bah Lanong u dei ban leit phai biang sha East Shillong,” u la ong.
