Lada phi ujor ki ehjahar katno katno ruh, uwei u ‘ñiuh mat na ngi un nym khih : JAC

Mawsynram, Risaw, 11: Ka Joint Action Committee (JAC) kaba kynthup ïa ki saw tylli ki Sengbhalang jong ka Sawsymper kata ka KSU, FKJGP, HYC bad HUAM hynne ka sngi ka 11 tarik u Risaw, 2022 ki la leit sha Mawsynram Police Station, East Khasi Hills District hadien ka jingshah ujor ehjahar ha u Syiem ka Hima Maharam.
Ka jingleit jong ki nongïalam ka JAC hapoh Mawsynram Police Station, East Khasi Hills District ka dei hadien ka jingleit ban jurip jong ki ïa kawei ka karkhana maw ha Umnongrim, Wahmawpat kaba long hadien ba ka ophis jong u Syiem ka Hima Maharam Syiemship ka la pynmih biang ïa kawei ka hukum ha ka 31 tarik u Nailar, 2022 ban khrong khajna ïa ki kali kit maw hapoh ka Raid Sawsymper.
Ha ka jingshah ujor ehjahar katkum ka jingïathuh ki nongïalam ka JAC ka long na ka bynta ki lai ngut kiba la ai jingkren ha ka sngi ba ki leit ban jurip jong ki ïa kawei ka karkhana maw bad khang ïa u nongan lum khajna ba um bit da lei lei ban wan khrong namar ha ka soskular kaba la ïateh da ki ‘riew rangbah ka Raid Sawsymper bad u Syiem Bamonsing ha ka snem 1944 kaba la ong, “U Syiem ka Hima Maharam u la lah ban synshar tang ïa ki khlieh briew katba ïa ka khyndew ka shyiap yn synshar hi da ka Raid Sawsymper”.
Hadien ka jingleit ïa kynduh hapoh Mawsyn-ram Police Station, u bah Gilbert Kharraswai, Chair-man jong ka Joint Action Committee (JAC) haba kren ha ki lad pathai khubor u la ong ba hadien ba u Syiem ka Hima Maha-ram u la phah ïa ka jingpynbna ne notice ba kan don ka jingkhrong khajna na ki karkhana tylliat maw ha Umnongrim, Wahmawpat na ka liang ka JAC ki la ïashong kyrkhih ïa ka jingïalang ban ïa pyrkhat. Hadien kata, dei ha ka 19 tarik u ‘Nailur, 2022 ki la leit ban jurip ïa katei ka karkhana tylliat maw bad ïa kynduh ruh ïa ki trai bad da lei lei kin nym ai lad ïa kane ka bynta ba u Syiem u la bthah ban siew ïa kata ka khajna bad ha kato ka sngi ki la maham ruh ïa u nongkhrong ba la buh da u Syiem ba um bit da lei lei ban wan khrong namar haduh mynta kane ka jaka ka dei hapoh ka jingpeit jong ka Raid Sawsymper bad ym ju don hi ruh kata ka jingsiew khajna.
U la ong ruh ba hadien kata ka jingleit, ki nongïalam jong ka JAC ki la shah khot pynban ha ki bor pulit hapoh ka Mawsynram Police Station ha kaba mynta ka sngi ka 11 tarik u Risaw, 2022 ki la leit bad lap ba ka don ka jingshah ujor na u Syiem ïa ki lai ngut ki nongïalam kiba la ai jingkren ha ka 19 tarik u ‘Nailur, 2022 bad la pynngat ruh ïa ki ha ka kyndon aiñ kaba 41(a) CrPC. Namarkata, halor kane ka jingleh jong u Syiem, kum ka JAC da kawei ka sur ka pynpaw ka jingpynrem ïa kane ka bynta bad jingleh khawpud jong u Syiem bad kumjuh ruh kane ka jingleh jong u Syiem ka thmu ruh ban pyntiengkoh tympan ïa ki.
“Da kaba shai ka JAC ka phah ka khubor sha u Syiem ba phi lah pyntien katba phi pyntien, phi byrngem katba phi byrngem, phin ai ïa ngi katno tylli ki jingujor ne ki ehjahar, na liang jong ngi wat uwei u ‘ñiuh mat ruh un nym khih”, ong u bah u bah Gilbert Kharraswai, Chairman jong ka JAC namar kum ka JAC ka ïeng beit ha ka nongrim kaba skhem.
U bah Gilbert Kharraswai, Chairman jong ka Joint Action Committee (JAC) u la bynrap shuh shuh ba kawei pat ka khubor sha u Syiem ka long ba kum ki nongïalam kim dei ki khawpud ha kaba nangne shakhmat lada u Syiem u dang pynkhluid ki ruh ki khluid, katba u dang pynshit ki ruh kin dang shit namar kum ki nongïalam shiliang ka kjat ha surok bad shiliang pat ha phatok.
Ha kane ka sngi la ïoh ruh ka jingkren na u Runningstar Kharbani, dkhot jong ka Joint Action Committee (JAC) ha ryngkat ka jingsynlang ruh da kiwei pat ki nongïalam jong ki saw tylli ki Sengbhalang jong ka Sawsymper kata ka KSU, FKJGP, HYC bad HUAM.