Khliehriat, Risaw 10 : Kumba ka National Green Tribunal ka la khnang pyrshah ban tih dewïong bad khaiï dewïong beañ naduh u snem 2014, kumta ki bor district jong ka East Jaiñtia Hills District ka la pynjari da ka kyndon aiñ 144CrPC ha East Jaiñtia Hills District ban tehlakam ïa ka jingtih dewïong beañ namar ba ki la don bun ki jingjia ba sngewsih kiba na ka daw ka jing tih dewïong beañ na ki par dewïong kiba don hapoh ka District.
Katkum ka hukum ba la pyllait da u District Magistrate jong ka East Jaiñtia Hills District la mama ban tih dewïong, la mama ban khaiï dewïong lada khlem biang ki Chalan, ki kot ki sla ba donkam bad lada khlem biang ki license na ki bor ba dei peit.
Lada lap ïa kino kino kiba pynkheiñ ïa ka hukum yn pynshitom ïa ki katkum ka aiñ bad yn pynngat ruh hapoh ki kyndon aiñ jong ka 188 IPC.
Kane ka hukum kan treikam noh mardor tat haduh ban da pynbna da kumwei pat.
