Jowai Risaw 10: Kawei na ki seng jong ki longkmie napoh ka Rilum Jaiñtia kaba la tip kum ka ‘Hynñiewtrep Women Welfare & Development Organization’ (HWW&DO), hadien ka jingïohi jong ka dala ki jong ki khmat ïa ka rukom treikam jong ka ophis treikam u Superintendent of Police ka East Jaiñtia Hills District ïa ki jingdonkam jong ki paidbah nongshong shnong.
Na ka liang ka seng ka ai jingïaroh kaba khraw eh ïa katei ka ophis hapoh ka jingkhmih jong u khliehduh ki pulit ka District u Jagpal Singh Dhanoa, IPS halor ka jingïaid beit ïaid ryntih jong ki kam ki jam katei ka ophis kaba la pynhun shisha ïa kiba bun ba lang ha ka por ba ki leit donkam sha katei ka ophis.
Ka kong Oibarly Suchiang kaba dei ka President ka seng bad ka Secretary kong Bynta Lyngdoh kila pynpaw ruh ka jingai khublei ba kyrpang eh ïa katei ka tnad pulit ha East Jaiñtia, halor ka nongrim ba ka seng kala lap da la ki jong ki khmat ïa ka rukom treikam haka por ba ki leit donkam sha katei ka ophis dang ha une hi u bnai Risaw.
La ïathuh ha katei ka jingleit donkam ki dkhot ka seng kila poi haka por janmiet 5 baje tam eiei hynrei ki nongtrei ki jong katei ka ophis ki dang pyndep shait shait ïa ki kam kaba dei ba leh na ka bynta ki paidbah, nalor sa ka jingwan trei biang por jong ki nongtrei ha ka por mynstep.
Halor kane ka seng ka buh ruh ka jingkyntu ïa kiwei de ki tnad sorkar hapoh ka Ri-Lum Jaiñtia ba kin bud lem ïa kane ka nuksa kaba bha jong katei ka ophis kaba long ruh kawei na ki lad bad ki jingmyntoi ba ki paidbah ki lah ban ïoh na ki ophis sorkar.
Ka seng ka ai ruh ka jingkitbok kitrwiang ïa katei ka ophis ba kan nang ïaid shakhmat ha ki liang baroh jong ka jingshakri naduh ki ophisar, ki nongtreikam (Staff) bad kiwei de kiba don bynta ha katei ka ophis ba kin nang trei khambha ïa ka kam ha ki sngi kiba dang wan.
