Nongpoh, Risaw 03: U Myntri Rangbah ka jylla u Conrad K Sangma mynta sngi Nyngkong u la leit ban buh ïa u mawnongrim ban tei ïaka International Medical College & Hospital bala ai nam haka kyrteng u Purno A Sangma Myntri Rangbah barim ka jylla Meghalaya kaba dei ruh ka jingphohsniew jong ka ERD Foundation Guwahati bad u Founder Chairman jong ka u Mahbubul Hoque ha skul bah University of Science and Technology.
La sakhi ruh ha katei ka sngi ka jingbuh ïa u mawnongrim da ka jingdonlang ka Rhonda Vetere kawei naki longkmie ba khlaiñ bor haka pyrthei haka liang ka technology, ka nongthoh bad kaba dei ruh ka nongïalam na USA bad kaba long ruh kum ka Global Ambassador jong ka USTM, u Bah Lakmen Rymbui Myntri ka tnad pule puthi ka jylla, Bah Sosthenes Sohtun MLA ka Jirang, RS Mooshahary Governor barim ka jylla bad kiwei kiwei ki kynrem ki lyndan.
Katei ka Medical College kan don ruh 200 tylli ki jingthiah kaban sa tei haka rukom kaba ïaryngkat kyrdan bad ki hospital haka pyrthei naduh ki rukom sumar, ki tiar ki tar ryngkat ka thong ban ai jingsumar ei lut ïaki longiing baduk jong ka jylla Meghalaya, bad katei ka Medical College kan don ruh ka thong ban pynlong ki jingwad bñiah (research) ha kaba ïadei bad ka koit ka khiah bad khamtam ban khring ïaki samla pule bad ki nongpang naki ri ka pyrthei khamtam ki ri ba marjan jong ka India.
Naka liang u Mahbubul Hoque Chairman ka ERD Foundation ba dei ruh u Chancellor ka skulbah USTM u la ong ba katei ka Medical College kan long ka jingkyrkhu kaba khraw ïaki samla pule ka thaiñ bad yn buh thong ban pyndep ha shuwa u 2025 bad naduh u 2026 yn sdang ban pdiang ïaki samla kiba kwah pule MBBS ha katei ka College.
U Conrad Sangma haba kren ha katei ka sngi u la pynpaw ka jingsngewkmen kaba khraw halor katei ka sienjam bala thmu ban tei ïaka International Medical College & Hospital kaba ïaryngkat dor bad ki College haki ri ka pyrthei kaba long ka jingkyrkhu kaba khraw ïaki paidbah bad kumjuh ki samla pule, kaba la ainam ruh ha kyrteng jong u kpa jong u, u Purno A Sangma.
U la ong ruh ba kum ka sorkar kan wad ki lad ki lynti ban treilang bad ka USTM khamtam ha kaba ïadei bad ka jingtei ïa katei ka College ba kum ka jylla ka donkam ïaki samla pule MBBS, ki doctor ban shakri ïaka jylla bad khamtam ban kyntiew ïaka koit ka khiah
