Jowai, Nailur 30: Ki bor pynïaid District ba kynthup ïa u Deputy Commissioner bah B.S. Sohliya, IAS, u Superintendent of Police u Bikram D. Marak, MPS ryngkat ki ophisar na ka tnad PWD bad Transport Department kila shong jingïalang hynnin ka sngi na ka bynta ban ïapyrkhat halor ka jingeh ba ki paidbah ki ïakynduh na ka jingdon bun palat ki Speed Breaker kiba dang shu dep buh shen ha nongbah Jowai.
Ha kane ka jingïalang ki bor pyniaid District kila buh sngi ha ka 6 tarik jong u bnai Risaw ban pynlong ïa ka jingleit jurip ha ka por ba ïaid bun ki kali motor ha ki bynta jong ka sor Jowai, khnang ban ioh peit bniah ïa ka jingsahkut kali kaba lah ban mih na ka jingdon jong kine ki speed breaker.
U Deputy Commissioner ula ïathuh ba dei tad hadien jong ka jingleit jurip ba yn sa lah ban shim rai la yn pyndam ïa kine ki speed breaker ne ban kham pynmadan ïa ki, khnang ba kan ym don kano kano ka jingktah ïa ka jingïaid beit jong ki kali motor.
