Khliehriat nailur 28: Da ka jingkhmihlynti ban wanrah ïa ka roi ka kiew hapoh ka Sutnga Saipung constituency, u MDC ba rim jong uba na ka party Congress lem bad ki nongkyrshan jong u bad shiphew ngut kiwei pat kiba dei ki nongkitkam jong ka United Democratic Party mynta ka sngi ki la pyniasoh noh ïalade bad ka party NPP bad shim ka rai ban kyrshan ïa ka kong Santa Mary Shylla ka ban ïakhun ha kane ka MLA election ka ban wan na ka party NPP na Sutnga Saipung constituency.
Ha ka jingïalang ba la pynlong mynta ka sngi ha shnong Sutnga ba la knot pynlong da ka 5-Sutnga-Saipung Block National People’s Party la pdiang burom ïa kitei kiba pyniasoh sha ka party kiba kynthup u MDC ba rim jong ka Congress u bah Moya Darnei lem bad ki nongkyrshan jong u, kumjuh ruh kiwei pat kiba na ka party UDP ki kynthup u President jong ka UDP, u Kungliana Darnei, Vice president jong ka UDP, u bah Thianga Nampui, General Secretary jong ka UDP, u Sangpuia Nampui, Assistant Secretary jong ka UDP, u Lalrama Nampui lem bad hynriew ngut ki ju bat kum ki Advisers ha ka party UDP, u Zosiama Thianglai, u Neichonga Nampui, u H.W.Fowler Darnei, u Lalchonga Nampui, Lalremzoma Nampui bad u Ngailiana Thiate.
Katkum u kyrwoh ba la pyllait da u General Secretary jong ka 5- Sutnga Saipung Block NPP, u bah Heimon Lamare, la ong ba u bah Moya Darnei, u MDC ba rim u la wan ban pynïasoh da kaba u la wanrah lang ruh ïa ki nong kyrshan jong u halor ka jingthmu ba kin kyrshan noh ïa ka kong Santa Mary Shylla ka ban iakhun ha kane ka election ka ban wan.
Kiba la ïa don ryngkat lang ha kane ka sngi ha ka jingïalang ki kynthup ka kong Santa Mary Shylla, kaba la pynïaid ïa ka jingïalang, u MDC jong ka Sutnga Narwan, u bah Seibor Shadap, u bah Joinriwell Pyrtuh, uba dei u MDC ba rim jong ka Bataw Lakadong, u bah Thomas Nongtdu, Nominated MDC, u bah Bankupar Sutnga, Acting Doloi jong ka Elaka Sutnga, la ïa don ryngkat lang ruh ki nongïalam bad ki dkhot jong ka NPP kiba naduh ki Unit bad ki Circle kiba na East Jaiñtia Hills District.
