‘Hap kongnguh ka company Dalmia ïa ka jingdawa jong ka DS Thangskai ban bym wanrah ñiut shuh’

Khliehriat Lber 31: Ban pynpaw ïa ka jingsngew pyrshah ïa ka jingwanrah ka company Dalmia ïa ki ñiut hapoh shnong kiba la wanrah na ki jaka bapher bapher, ki paidbah jong ka shnong Thangskai, East Jaintia Hills District mynta ka sngi ki la ïa mih paidbah kynthei bad shynrang ha khmat ka khyrdop jong ka company dewbilat jong ka Dalmia Cement Bharat Ltd ban khanglad ïa baroh ki kali kiba rung sha company.
“Myn ha ka 28 tarik mynta u bnai ngi la leit biang shapoh company bad jurip ïa ki jaka buh ñiut bad ngi iohi ba ki dang don kumjuh hi ki ñiut, ngi la beh ruh ïa ki kali kiba wan kit ïa ki ñiut ki jaboh, kiba thmu ban rung shapoh company, mynta ngi la rai ba ngin khang noh syn don ïa kane ka company lada kam sngap ïa ka jingdawa ka Dorbar Shnong” ong u Waheh Shnong Thangskai, u ma Phaibiang Syrti.
U la iathuh shuh shuh ruh ba myn hynnin ka sngi ha ka por ba wan ki heh na ka ophis u Deputy Commissio-ner East Jaiñtia Hills District, uba mut ban leit jurip ïa ki ñiut kiba don hapoh company ha ka jingiadon ryngkat lang bad ki dkhot ka shnong, la ong ba ki nongap pahara (Security) jong ka company ki khlem plie satia ïa ka khyrdop, na ka liang u Waheh Shnong bad kumjuh u Magistrate na ophis u DC ki la pyrshang ban phone ïa ki heh jong katei ka company hynrei ym don ba shim ïa ka phone, kumta ki hap ban shu leit phai noh khlem da iohlad satia ban rung shapoh company.
La iathuh ruh ba ki nong ap pahara jong ka company Dalmia, ki la ong ba ki la ioh ïa ka hukum ba kim dei ban plie ïa ka khyrdop wat lada wan u Magistrate ne Waheh Shnong ruh.
La ong shuh shuh ba ka Dorbar Shnong ka la dep phah shithih sha ka company Dalmia naduh u bnai nohprah 2021 bad bthah ïa ka company ba ym dei shuh ban wanrah ïa ki ñiut hapoh company kaba don hapoh shnong namar kane ka pynmih ïaka jingsma iewtung bad kumjuh ruh ki ñiut ki ju saphriang kylleng kylleng haba beh ka lyer bad ong ba ïa kine ki ñiut la wanrah na Silchar, na Guahati, na Mizoram, Agartala bad na kiwei kiwei ki jaka, halor kane ka jingleh ka company ka shnong kala ujor ruh sha u Deputy Commissioner ka East Jaiñtia Hills District myn ha u bnai rymphang 2022, hynrei na ka liang ka ophis u DC ruh kam shym la shim khia eiei halor kane, kumta na ka liang ka shnong kam banse ban hiar sha katei ka company ban maham ïa ka company ban sangeh noh shi syndon ïa kane ka jingwanrah ñiut hapoh shnong.
Kumjuh ruh u Assistant Waheh Shnong Thangskai, u bah Alprins Dkhar, u la iathuh ba kane ka jingiakhih mynta ka sngi ka la neh haduh kumba san kynta tam tat haduh ba na ka liang ka company ka la kular ba kan pynsangeh noh shi syndon ïa kane ka jingthang ñiut bad ka jingwan rah ñiut, ka company ka la kular ruh ba kan nym shah shuh ïa ki kali ba kit ñiut ba kin rung sahpoh plant bad haba kren shapang ka company, u la ong ba “Kane ka jingleh ka long kumba kane ka company la iuh roit ïa ka shnong bad ruh na ka liang ka ophis u DC ruh kam shym la leh eiei halor kane ka kam watla ka Dorbar Shnong ka la dep buh jngthoh mynta kumba la shi bnai tam, hynrei dei tat hadien ba la paw ha ki pathai khubor ha kaba na ka ophis u DC ki la pyntip bad phone sha u Waheh Shnong ba kin wan ban jurip hynrei ha ka sngi ba wan jurip kaba lyngngoh ba wat ïa u briew jong u DC ruh kine ki nong ap pahara kim khieñ snep satia wat tang ïa ka khyrdop ruh kim plie”
U General Secretary ka FKJGP East Jaintia Hills District, u bah D.Sumer u la ong ba ka seng ka la wan lang ha kane ka sngi kum ka jingkyrshan lang ïa ka Dorbar Shnong Thangskai kaba pyrshah jur ïa ka jing wanrah ñiut hapoh shnong bad kyrshan ruh ïa ka jing dawa ban sangeh noh shisyn don ïa kane ka jingwanrah ñiut hapoh shnong.
Dei namar ka jingpyneh ki dkhot ka Dorbar Shnong ryngkat ki paidbah bad kumjuh ki dkhot ka Federation of Khasi Jaiñtia and Garo People East Jaintia Hills District kiba la pynpaw ba ki kwah da ka jingthoh kaba shai na ka company ba ka dei ban kular ban sangeh noh ïa ka jingwanrah ñiut, kumta ki heh jong ka company Dalmia ki hap ban pyndem bad kongnguh ïa ka jingdawa, ha kaba ki la ai da ka jingthoh ba ka company ka la rai ban pynsangeh noh shi syndon ïa ka jingwanrah ñiut hapoh ka cement plant bad ïa kito ki kali kiba dang don ha lynti ruh kiba thmu ban wanrah niut ki la kular ban pyn sangeh noh, ha kaba ïa ka jingthoh ba la aiti sha u Waheh Shong la soi da u Unit Head jong ka company Dalmia, u C.P.Tiwari.
Haba kren sha ki pathai khubor, na ka liang utei u heh jong ka company Dalmia Cement Bharat Ltd, u la ong ba ha kaba iadei bad kane ka jingwanrah ñiut hapoh Cement Plant, ka company ka la ioh jingbit ne No-Objection Certificate na ki tnat bapher bapher “Ha man la ki jaka ka la don ka jinglum thup ïa ki ñiut, kaba ju buh jingeh bha, kumta ka company ka la shim bad lum thup ïa ki niut ban thang ha ka cement plant , kane ka dei kaba bha ba ngi la leh ha ka imlang ka sahlang, ngi la shim ïa kine ki ñiut na ki cooperation bapher bapher bad ngi la dep ban ïa teh kular bad ka Shillong Municipal Coorporation, bad ka Guahati Municipal Coope-ration, ngi la ioh ruh ïa ka NOC bad Clearance na ka tnat Meghalaya State Pollution Control Board bad ngi dang mut ban teh kular ruh sa bad ka Jowai Municipal Cooperation bad kumjuh ruh bad ka Khliehriat, namar ngi thang ïa kine ki ñiut ha ka plant”
Haba kylli shaphang ka jing ioh jingbit kaba na ki bor pyniaid shnong, u C.P.Tiwari, u la ong ba kum kine ki jait jingpyndonkam ym shym la don kano kano ka jingbthah ba ki donkam ban ioh jingbit na ka shnong namar ïa kine ka company ka pyndonkam tang hapoh plant bad ong ba ki la buh bha ruh ba kan nym pynsniew ïa ka mariang, la ong ruh ba ki bor pyniaid shnong ki tip ïa kane ka jingwanrah ñiut tangba ym dei pat ba ki tip da ka lynti (Not through direct coomunication) “ngi la sdang ban lum ïa ki ñiut na ka shnong Thangskai ruh bad ngi la dep sam ïa ki jaka bret ñiut sha ki long iïng ba kin pynlang ïa ki ñiut” la bynrap.
U la iathuh ruh ba ki ñiut ba la lum thup kim shym la saphriang satia namar la buh bha ia ki ha kawei ka jaka bad ha ka lawei ruh u kular ba ka company kan buh bha ïa ki ñiut ba kan nym pynsniew ïa ka mariang ba ba kan nym buh jingma ïa ki paidbah.
U President ka FKJGP East Jaiñtia Hills District, u bah M Suting, u la ong ba ka seng ruh ka sngew kmen lang bad ka Dorbar Shnong Thangskai halor kane ka jingjop ha kaba mynta ka sngi ka company ka la kular shai ba kan nym wanrah shuh ïa ki ñiut hapoh cement plant, na ka liang ka seng ka ai khublei ïa ka Dorbar Shnong Thangskai kumjuh ruh ïa ka ophis u Deputy Commissioner.