Khliehriat nailur 26: Ka Meghalaya People United Front (MPUF), mynta ka sngi ka la pynïar shuh shuh ïa ki tnat treikam da kaba pynkha sa ïa ka MPUF-Mookhep Unit bad ka Mookhep Women’s Wing Unit , ha kaba ïa ka jingialang la pynlong ha Dorbar Hall jong ka shnong Mookhep East Jaiñtia Hills District bad ïa ka jingïalang la pyniaid da u General Secretary MPUF East Jaiñtia Hills District, u bah Kmen Siangshai.
Ïa ki nongïalam bad ki dkhot jong ka Mookhep Unit bad ka Mookhep Women’s Wing Unit la pynbam smai da u President MPUF sengkmie u ma Dapoiwanmi Laloo ha kaba u la ai ruh ka jingkren bad jingpynshai halor ka rukom treikam bad ka thong jong ka seng kaba na ka bynta ka bha ka miat jong ki paidbah.
La ïoh ruh ïa ki jingkren kyntu kynpham na u President MPUF-EJHD, u bah Kyrshan Blah uba la iathuh bad pynshai shuh shuh ba kane ka seng ka dei ka seng kaba peit bad ïa tynrong lem ïa ka jingeh ki briew khamtam ïa kiba duk ba rangli kiba shah ieh khunswet, da kaba na ka por sha ka por ka seng ka juh leit ai jingiarap ïa kine ki briew kiba donkam shisha ka jingiarap, la ong ruh ba ka seng ka ïoh ban ïarap dei lyngba ka jing ïa kynshew pisa lang katba ioh jong ki para dkhot ka ba long na ka bynta ban noh jingiarap ha kano kano ka por.
Ha kane ka jingïalang la donlang ruh u General Secretary NPP ka 6-Khliehriat Constituency ma Iasyllok-Ki Lyngdoh, ma Jonny Phawa President San Shnong MPUF lem bad ki dkhot ka seng.
Ki nongkit kam jong ka Mookhep Unit ki ba la pynbam smai ki kynthup, u President, u samla S. Shiangshai, Vice President, u Babu Rymbai, General Secretary, u samla Ioanis Rymbai, ki nongkitkam ka Mookhep Women Wing Unit, ki kynthup, ka President, ka kong Youkiniki Rymbai, Vice President, ka kong kong Karbelin Rymbai, General Secretary, ka kong Eity Summer lem bad kiwei kiba dei ki dkhot jong ka Executive Committee.
Na ka liang ka President MPUF- Women Wing Unit ka kong Youkiniki Rymbai, ka la ai ka jing khublei kitbok kitrwiang ïa ka seng MPUF bad sngeenguh ruh ba ka seng ka ai lad ïa ki kynthei ban pynrung ialade sha ka seng jong ki bad ong ruh ba katkum ka jingiohi jong ka, kane ka seng ka dei kawei na ki seng kaba trei ruh na ka bynta ban ïarap ïa ki kup shilliang ki sem shilliang.
