Doha, Nailur 24 : Ïa ki ticket na bynta ka FIFA World Cup 2022 ban sa pynïalehkai ha Qatar naduh ka 20 tarik u Naiwieng haduh 18 tarik Nohprah yn sdang die biang ha ka 27 tarik mynta u Nailur 2022 naduh ka por 2:30 baje janmiet (12.00 ka por ha Doha), pynbna ka FIFA ha ka sngi Thohdieng.
Shibun ki paidbah nongkyrshan kiba sah ha Qatar ki da kwah eh ban thied ïa ki ticket hadien ba ka FIFA ka la pynbna biang. Ka Sharmili Datta Gupta kaba sah ha Doha man ka sngi ka ju plie ïa ka account jong ka FIFA ban peit lano ka FIFA kan pynbna biang ban die ïa ki ticket.
“Nga la thied ïa ka ticket ha ka kylla kaba nyngkong, hynrei kam pat biang sa mynta ka kylla kaba ar. Nga ngeit skhem ba la die ïa ki ticket haduh ka jingïalehkai quarters, semi bad final. Hynrei ka dor na bynta ka jingïalehkai group stage ka long kaba rem dor,” ong ka Gupta kaba la thied ïa ki ticket na bynta lai ngut kiba haïing jong ka shaduh ka jingïalehkai semifinal kaban pynlong ha Lusail Stadium ha ka 13 tarik u Nohprah.
“Ki saw tylli ki ticket ba nga la thied ki kot sha ka QR500 (11,099 ha ka pisa India) kawei ka ticket. Ngan sa peit ba ngan ïoh bat shuh shuh ki ticket ha ka kti lada ki dang ailad biang,” ong ka Gupta kaba dei ruh ka nonghikai skul kaba hikai ha ka skul America ha Doha.
Katei ka jingdie ïa ki ticket kan long lyngba ka FIFA.com/tickets bad kan bteng ban plie haduh kaba kut jong ka tournament kaban sa pynlong ha ka 18 tarik u Nohprah 2022.
Ka Amma Pervaiz Rao ka nong Pakistan ka la pynkhreh ban thied ïa ka ticket ha ka por janmiet ha ka 27 tarik Nailur. “Nga kwah ban thied ïa ka ticket ha ka dor QR 35 (781 tyngka ha ka pisa India),” ong ka Rao, kaba trei ha Qatar University.
Katkum na ki nongpynïaid la ïathuh ba ka jingdawa na bynta ka ticket ïalehkai FIFA World Cup ha Middle East haduh mynta ka dang bteng. Ka Qatar kaba ïateh lok bad ka Dubai ha ka liang ki kam jngohkai pyrthei kiba la pynkhreh ban ïoh nong lyngba katei ka tournament la khmih lynti ba kin don da ki million ngut ki nongkyrshan na kylleng ka pyrthei kiban wan ha katei ka ri ban sakhi ïa katei ka jingïalehkai.
Ka Qatar’s Gulf Cooperation Council (GCC) ha ryngkat ki ri ba marjan kum ka Saudi Arabia, UAE bad Oman ki la nang kiew ha ka jingdon ki briew kiba leit da ki liengsuiñ ha Doha, kaba dei ka jaka pdeng jong ka Qatar Airways.
Ha ka kylla kaba nyngkong jong ka jingdie ïa ki ticket kaba la long ha ka 5 tarik Naitung haduh ka 16 tarik Nailar la dep ban die haduh 520,532, pynbna ka FIFA bad baroh ka dor jong ki ticket ba la dep dien ka kot sha ka 2.45 million.
Ïa ka Hayya card ki paidbah ki lah ban rah khnang ba kin ïoh ban pyndonkam ha ka jingleit jingleit ha ki sngi jong ki jingïalehkai bad kan long ruh ka jingmyntoi kum ha kaban rung sha ki jaka paidbah.
Ka Qatar, ha kaba ki bor ba halor ki dang bunkam ban pynkhreh na bynta katei ka World Cup, ka la khang ïa ka jingrung ki nongwei khlem ki ticket bad ka Hayya cards naduh ka 1 tarik Naiwieng haduh ka 23 tarik Nohprah.
