Bud dien ka JYF-EJHD halor ka jingdawa ban ker da ki nar ïa ki lynti ïaid kjat ba la shna da ka G.R.Infra

Khliehriat Nailur 22: Ka Jaiñtia Youth Federation East Jaiñtia Hills District, hynnin ka sngi ka la leit buh biang da ka jingthoh ha khmat u Deputy Commissioner ka East Jaiñtia Hills District, kum ka jingpynkynmaw ïa ka jingdawa jong ka seng kaba la dawa ïa ka G.R.Infra ba kan shna bad ker bha da ki nar (Ornamental Railing Barricade) ha ki lynti ïaid kjat (footpath) ba la shna da ka company shna surok ka G.R.Infra, kata naduh shnong Dkhiah ter ter shaduh Khliehriat.
Kumta halor katei ka jingdawa ka seng ka kyntu ïa ka ophis u Deputy Commissioner ba un sngewbha ban tuklar lem halor kane ka ban long na ka bynta ka jingbit jingbiang jong ki paidbah ba kan nym bud jingma, jingsyier ïa kiba ïaid lynti.
Lyngba ka jingthoh, ba la soi kyrteng da u President jong ka JYF-EJHD, u bah J.Pala bad u General Secretary, u bah B.Chyrmang, ka seng ka la pynpaw ka jingsngew khia halor ka jingbym don jingda jingker ki lynti ïaid kjat khamtam ha kito ki bynta kiba dei ha ki jaka ïew bad ha ki jaka ba don ki skul, namar ka buh jingma bha namar ba ki dei ki jaka ba bun briew.